• A concesionaria non terá que pagar ningunha taxa ou canon
• O Concello sufragará os custos de subministro de auga, saneamento, calefacción e enerxía eléctrica
O goberno de Ponteareas informa que o Boletín Oficial da Provincia (BOPPO) xa publicou o expediente e pregos do procedemento en concorrencia para concesión demanial da cafetería no Centro Social de Ponteareas.
Co obxectivo de salvar as limitacións horarias ás que se suxeita a explotación da cafetería e ofrecer avantaxes que posibiliten a rendabilidade deste negocio, o goberno de Ponteareas non cobrará ao concesionario ningunha taxa ou canon e sufragará os custos de subministración de auga, saneamento, calefacción, enerxía eléctrica e, a alarma no caso de que se instale, así como o mantemento das instalacións. A concesión outórgase por un prazo de 5 anos a contar desde a súa formalización, prorrogable anualmente por acordo entre as partes ata un máximo de 2 anos.
As proposicións deberán ser entregadas en sobre pechado no rexistro xeral do Concello en horario de 9.00 a 14.00 horas rematando o prazo o xoves día 26 de xullo. A documentación tamén poderá presentarse nas oficinas de Correos na forma establecida no prego de condicións.
A cafetería do Centro Social de Ponteareas ten unha superficie útil de 106,05m2 e dispón dun espazo destinado a cociña, almacén, barra e cafetería. Está situada no andar baixo do Centro Social, na rúa Oriente do centro urbano, onde se prestan servizos adminitrativos.
As condicións para participar no procedemento regúlanse no prego de cláusulas económico-administrativas. No mesmo tamén se regulan as obrigas e dereitos das partes.
O prego de condicións e planos do espazo poden consultarse na Casa do Concello no taboleiro físico de anuncios, e tamén pode consultarse electronicamente a través do taboleiro electrónico no seguinte enlace: https://ponteareas.sedelectronica.gal/board