A alcaldesa de Redondela, Digna Rivas, explica que o Concello está en contacto permanente coa Delegación do Goberno en Galicia para trasladarlle as necesidades das vías dependentes da Demarcación de Estradas do Estado, do mesmo xeito que se fai coa Xunta de Galicia ou coa Deputación nas estradas que son de titularidade autonómica ou provincial. Respecto á limitación da velocidade na curva da N-550 de Cesantes sinala que “deben ser os técnicos os que valoren as actuacións necesarias na estrada”. Rivas advirte tamén da importancia de que os condutores “respecten a velocidade máxima permitida así como todas as normas de circulación”. En canto ao accidente que lle custou a vida a dous mozos nesta estrada o pasado luns, advirte que haberá que esperar ao resultado da investigación da Garda Civil de Tráfico para esclarecer as causas do sinistro.
O Concello de Redondela leva anos reclamando tamén melloras de seguridade viaria noutras estradas, como a vía autonómica PO-250 que conecta con Pazos de Borbén, onde hai varios tramos con curvas perigosas que supoñen un perigo tanto para o tráfico rodado como para os peóns. Outra demanda que mantén desde hai anos o Concello é a mellora da Avda Mendiño, de titularidade autonómica, neste caso sobre todo polo mal estado das beirarrúas.