• Os traballos, que se levaron a cabo nos últimos días, consistiron no repintado da sinalización horizontal nas rúas Pedro Campos, José María Lastra e Rúa do Colexio, tal e como explicou o alcalde, Manuel Campos
• O Goberno local realizou esta actuación dando así reposta a unha demanda proposta por nais e pais do alumnado do centro educativo cuntiense
O alcalde de Cuntis, Manuel Campos, vén de supervisar os traballos de mellora e reforzo acometidos nos últimos días na contorna do Colexio Público Integrado (CPI) Aurelio Marcelino García Rey. Tal e como explica o rexedor socialista, esta actuación foi levada a cabo polos operarios municipais para garantir e incrementar a mellora da seguridade viaria.
Os labores centráronse fundamentalmente en reforzar a sinalización horizontal existente na Rúa do Colexio, a Rúa José María Lastra e a Rúa Pedro Campos. Procedeuse a repintar toda esta sinalización, para que conten cunha maior visibilidade. O pintado realizouse tanto nos pasos para peóns da contorna, así como na parada de buses, zonas de estacionamento e vados de vivendas. Tal e como explicou o Manuel Campos, estes traballos leváronse a cabo antes do comezo do curso escolar, dando cumprimento a unha demanda realizada por nais e pais do alumnado do centro educativo cuntiense. “A seguridade viaria para nós é unha prioridade e máxime cando estamos a falar dunha zona pola que transitan cada día unha gran cantidade de persoas, especialmente rapazada, como é nestas rúas próximas ao CPI”, indicou o alcalde de Cuntis. Inicialmente, estaba previsto que estes traballos se desenvolvesen durante a semana pasada, pero foi necesario adialos ata este luns por mor das inclemencias meteorolóxicas. O alcalde agradeceu a comprensión das persoas residentes na zona, xa que para poder proceder ao pintado foi preciso limitar o aparcamento de xeito temporal.
