- José González puxo en valor o traballo fundamental que desenvolve esta entidade e a súa contribución de maneira significativa ao impulso da comercialización dos produtos da marca Artesanía de Galicia
- Reafirmou o compromiso coa entidade e a vontade de seguir traballando coordinadamente en futuros proxectos, con foco na comercialización
- O encontro, no que tamén participou o director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, enmárcase tamén no proceso de escoita activa de cara á elaboración do Plan estratéxico de Comercio
O conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, e pola xerente da Fundación Artesanía de Galicia, Elena Fabeiro, mativo un encontro coa directiva da Asociación Galega de Artesáns, representada polo seu presidente, José Manuel Salvado Sanín, e pola súa vogal, María Feijoo, co obxectivo de recoller as súas achegas para seguir traballando xuntos a prol dun sector artesán competitivo e adaptado ás novas realidades sociais e hábitos de consumo.
Durante a reunion, José González agradeceu o traballo fundamental que desenvolve esta entidade e a súa contribución significativa ao impulso da comercialización dos produtos da marca Artesanía de Galicia e da visibilización dos nosos oficios tradicionais e da heteroxeneidade do sector. Neste senso, cómpre destacar que a Asociación Galega de Artesáns é a entidade colaboradora da Xunta de Galicia para a xestión, almacenamento e reparto de todo o material identificativo desta marca paraugas impulsada pola Administración autonómica e do que fan uso os obradoiros e talleres asociados á mesma, como bolsas, etiquetas ou caixas. Tamén organizan dúas das citas de artesanía referentes no almanaque galego e que contan co apoio da Xunta de Galicia, como son Mostrat, na Coruña, e Ofeitoaman, en Sanxenxo (Pontevedra).
O titular de Emprego, Comercio e Emigración manifestou a intención de seguir traballando xuntos de xeito coordinado, incrementando a dotación dos últimos anos. Tamén falou da necesidade dunha futura colabración entre a Asociación Galega de Artesáns e a Fundación Artesanía de Galicia en proxectos que teñan o foco na comercialización, así como en avanzar na implantación da lei de artesanía, cuxo obxectivo é impulsar a artesanía galega cara ao futuro como unha actividade económica sustentable, xeradora de emprego e riqueza e vertebradora do territorio.
Esta xuntanza encádrase, ademais, no proceso de diálogo e escoita activa que ten marcha o Executivo galego para a elaboración do futuro Plan estratéxico de Comercio 2025-2030 -de cara a telo listo no primeiro trimestre do ano que vén- e que contempla tamén a potenciación da Fundación Artesanía de Galicia, e con ela, do bo facer dos nosos artesáns e artesás. Actualmente está aberto o proceso participativo para que os todos os axentes implicados poidan facer as súas achegas co obxectivo de afinar tanto a diagnose da situación do sector como as medidas a aplicar para aumentar a súa competitividade e avance en materia de transformación dixital, innovación e modernización.
