§ A iniciativa inclúe actividades físicas e artísticas nas distintas parroquias, así como obradoiros específicos
O Concello mantén a súa aposta por ofrecer un programa completo de actividades para o curso 2024/2025. A proposta está configurada por preto dunha vintena de propostas físicas, artísticas e tamén por obradoiros específicos. A iniciativa arrincará no mes de outubro, prolongándose ata mediados de xuño.
No que respecta ás actividades anuais, Paderne dispón dunha oferta composta polas seguintes alternativas: ximnasia, labores, pilates, corte e confección, cociña, zumba, baile e cestería. Todas elas celebraranse de luns a venres, en horario de tarde, en Paderne ou en Adragonte, Quintas, Souto, Velouzas, Vigo, Vilamourel e Viñas.
Por outra banda, ao longo do curso o Concello organizará cinco talleres de menor duración. O primeiro deles será o de tratamentos naturais e podas (Adragonte), que terá unha duración dun mes. De mediados de novembro a mediados de decembro, o Concello realizará un obradoiro de arte floral no Nadal (en Velouzas) e, en xaneiro, haberá un obradoiro específico de repostería de Entroido, ofrecendo unha sesión de dúas horas á semana (Quintas). En febreiro levarase a cabo un de defensa persoal para menores de 30 anos, ofrecendo unha sesión semanal en Vilamourel. Por último, nos meses de abril e maio celebrarase un último taller de coiro (dúas horas á semana en Viñas).
Como explica o alcalde, Sergio Platas, o programa busca un claro obxectivo: “queremos ofrecer aos maiores un programa de actividades que que poidan adquirir competencias e de todo tipo e, sobre todo, que lles permita manterse activos e socializar”.
O custo mensual das actividades e talleres varía en función da duración da sesión: 6,75 euros ao mes as de 1 hora, 7,5 euros se son de 90 minutos e 8 euros as 2 horas. Así mesmo, as persoas poderán pagar o curso completo.
Os interesados poderán anotarse no propio Concello de xeito presencial ou a través da sede electrónica.
