Trátase dunha montaxe teatral plantexada como unha experiencia participativa que converte ao espectador nun refuxiado máis. A obra denuncia a traxedia que as políticas migratorias da UE están a provocar. Un espectáculo único en Galicia, que non deixará indiferente ao público.
O Concello de Nigrán ofrece este domingo 20 de outubro ás 19:00 horas no Auditorio Municipal o espectáculo de teatro inmersivo ‘Vía Morta’, de Pallasos en Rebeldía. Trátase dunha montaxe plantexada como unha experiencia participativa que converte ao espectador nun refuxiado máis e que chega da man do Fondo Galego de Cooperación e Solidariedade e Culturactiva, co apoio da Xunta.
O proxecto ‘Via Morta’ está baseado na experiencia directa de Pallasos en Rebeldía en campos de refuxiados en Grecia e Palestina. Cunha proposta inmersiva, non hai escenario nin sala de butacas: o teatro enteiro convértese nun campamento e o público asistente forma parte del. O obxectivo é achegar aos espectadores á dura realidade na que viven millóns de persoas en Europa, que ven vulnerados os seus dereitos máis básicos, así como a hipocrisía da política comunitaria, que incumpre toda a lexislación internacional na materia. Con texto de Carlos Olalla, dirección de Eva Egido e un elenco formado polos lugueses Iván Prado e Fran Rei, xunto con Anabell Gago e Rocío Salgado, esta obra está inspirada na experiencia da caravana de Pallasos en Rebeldía a Idomeni, na que o propio Iván Prado participou.
“O teatro non pode permanecer impasible ante a deliberada política de esquecemento á que as persoas refuxiadas son hoxe sometidas”, sinalan desde Pallasos en Rebeldía. Vía Morta é unha oportunidade para non deixar caer no esquecemento o drama das persoas refuxiadas ás que a Unión Europea lles pechas as portas, introducíndonos na súa realidade a través da arte. Un espectáculo único en Galicia, que non deixará indiferente ao público.