· O acto tivo lugar na Senra e durante o mesmo tamén se presentou impresa a obra gañadora do pasado ano, ‘Papaventos abismados’, asinada por Marta Dacosta.
· O premio ten unha dotación económica de 2.500 euros, así como a publicación do poemario na editorial Apiario.
A Senra acolleu hoxe o acto de entrega do premio do V Premio de Poesía Filomena Dato, que organiza o Concello de Bergondo. Sara Martínez Bello é a autora premiada nesta ocasión con ‘Eira’. Durante o acto tamén se procedeu á presentación da obra gañadora o ano pasado xa editada, trátase de ‘Papaventos abismados’, de Marta Dacosta.
Ademais das autoras, o acto contou coa presenza de representantes da corporación municipal, incluídas a concelleira responsable da área de cultura, Patricia Vázquez, e a alcaldesa, Alejandra Pérez, así como as dúas persoas encargadas da edición por parte de Apiario, Antía Otero e Dores Tembrás.
O xurado valorou do texto “lectura que sostén o interese da lectora de comezo a fin, polo traballo coa memoria apoiándose na presenza do sensorial sen caer en tópicos e revelando conceptos como a violencia contida e a dignidade do común, o desenvolvemento dunha psicoxeografía propia, o uso coidado da linguaxe”.
O premio ten unha dotación económica de 2.500 euros. A maiores, o poemario gañador pasará a ser publicado pola editorial Apiario nunha das súas coleccións de poesía. Apiario é a encargada de coordinar este concurso de poesía e tamén levará a cabo a publicación da obra gañadora asumindo todo o proceso: deseño, imprenta, distribución e promoción.
Con este galardón, o Concello de Bergondo contribúe a aumentar a nómina de certames que impulsan a creación poética en galego, así como a rescatar do esquecemento a figura dunha muller fundamental e pouco coñecida dentro do movemento literario do Rexurdimento: Filomena Dato Muruais (1865-1926).
