Realizarase en colaboración coa Asociación O Eido do Cervo sobre dous trazados: un de 34 quilómetros, á Conla e outro de 18, ao Maneses.
Os Concellos de Campo Lameiro e Cerdedo-Cotobade, en colaboración coa Asociación Eido do Cervo, organizarán para o vindeiro domingo 1 de decembro o “II Trail do Cervo”, segundo se acordou tras unha xuntanza de traballo na que asistiron os alcaldes de Campo Lameiro, Carlos Costa, e Cerdedo-Cotobade, Jorge Cubela, e Xiana Fernández-Albor e Manu Torres Abal, pola entidade deportiva.
O II Trail do Cervo é unha proba deportiva de carreira por montaña tocando todo tipo de terreos sobre dúas distancias, unha de 34 quilómetros, á Conla e outra de 18 que terá como referencia a área recreativa fluvial do Maneses.
As saídas e a meta terán lugar na Praza do Concello de Campo Lameiro, comezando a proba longa ás 9:00 horas e a curta ás 09:30 horas para evitar aglomeracións na saída e que os participantes poidan manter unha distancia axeitada entre ámbalas dúas modalidades da proba.
Así, a primeira das modalidades, “Trail da Conla”, discurrirá sobre un trazado de 34 quilómetros con 1700+, unha proba de especial dificultade e preparada para os máis atrevidos. Esta proba pasará por paraxes tan emblemáticos do concello de Campo Lameiro como o Alto do Cádavo, o Alto da Conla, San Antonio de Penalba, a contorna do Parque Arqueolóxico, o monte e os regatos da Lamosa e de Painceiros, entre outros.
Tamén haberá outra modalidade, máis curta, o “Trail do Maneses”, cun percorrido de 18 quilómetros con 900+, unha proba sobre unha distancia máis curta pero tamén moi xeitosa e con certa dificultade. Pasará pola contorna do Parque Arqueolóxico, seguirá por Painceiros, subirá cara o campo de tiro da Armonda e baixará pola Muimenta cara o rego Maneses onde, unha vez alí, comezarán a subir cara a meta.
Para o desenrolo desta proba os concellos e a Asociación Eido do Cervo agradecen a colaboración dos veciños e comunidades de montes de A Lagoa, Praderrei, Fentáns, Parada, San Isidro, Quireza, Painceiros, Lamosa, Muimenta, Armonda e Castro de Orto, entre outras.
BELEZA PAISAXÍSTICA E DINAMIZACIÓN TURÍSTICA E ECONÓMICA
Esta carreira nace co obxetivo de dar a coñecer toda esta zona e de poñer en valor toda a riqueza natural e paisaxística que ten o concello de Campo Lameiro e de Cerdedo-Cotobade, unidos polo río Lérez como elemento que entrelaza a estas dúas poboacións do interior da provincia de Pontevedra.
Tanto Carlos Costa como Jorge Cubela salientaron a “importancia deste tipo de probas en contacto coa natureza e que van collendo cada vez máis forza e participación da xente á que lle gusta facer deporte ao tempo que percorren espazos naturais únicos como os que atesouramos en Campo Lameiro e Cerdedo-Cotobade. Todo isto unido á oferta gastronómica e hostaleira son elementos fundamentais para impulsar o territorio desde un punto de vista turístico e de dinamización económica”, sinalaron ámbolos dous rexidores.
