Cinco compañías teatrais encherán a o Edificio das Escolas de cultura durante todos os sábados de novembro ás 22:00 horas.
O Concello de Ponteceso pon en marcha unha nova edición do seu tradicional Ciclo de Teatro, que este ano celebra a súa trixésimo primeira edición. Ao longo do mes de novembro, a veciñanza e os amantes das artes escénicas poderán gozar dunha selección de obras teatrais de gran calidade, interpretadas por compañías recoñecidas e con temas de plena actualidade no Edificio das Escolas ás 22:00 horas.di
Raquel Fondo, concelleira de Cultura, destacou, na presentación do ciclo celebrada hoxe no salón de plenos do Concello de Ponteceso, na que estivo acompañada da técnica da área, Meli Amado, a importancia deste ciclo de teatro como “unha oportunidade para achegar ao público obras de gran calidade e fomentar a cultura no noso municipio”. Fondo tamén subliñou o compromiso do Concello con apoiar as artes escénicas, facilitando o acceso a espectáculos que non só entreteñen, senón que tamén invitan á reflexión sobre cuestións sociais relevantes.
A programación arrincará o vindeiro 2 de novembro coa obra ‘Unha inimiga do pobo’ a cargo da compañía Talía Teatro. Esta representación, unha adaptación da coñecida obra de Henrik Ibsen, propón unha reflexión crítica sobre a corrupción, a responsabilidade social e os conflitos entre o poder e a cidadanía. O público terá a oportunidade de afondar nunha peza que, a pesar do tempo transcorrido dende a súa creación, mantén unha vixencia indiscutible.
Seguindo co calendario, o 9 de novembro será a quenda de Redrum Teatro coa obra ‘O pequeno poni’. Trátase dunha emotiva historia que aborda temas como o acoso escolar e a exclusión social a través dos ollos dun neno e a súa familia, brindando unha perspectiva honesta e conmovedora sobre a infancia e a súa vulnerabilidade.
O 16 de novembro, Talía Teatro regresará a Ponteceso cunha nova proposta: ‘Desexo’. Esta peza explora as complexidades das relacións persoais e as tensións emocionais que poden emerxer no seo das familias, co habitual coidado interpretativo e posta en escena desta veterana compañía galega.
Cara ao final de mes, o 23 de novembro, a compañía Mala Sombra subirá ao escenario con ‘Testosterona’, unha comedia que afonda nas diferenzas entre homes e mulleres e os estereotipos de xénero, cun enfoque humorístico e crítico que convida ao público a rirse de si mesmo mentres reflexiona sobre cuestións de igualdade e roles sociais.
Por último, o 30 de novembro, Leti da Taberna pechará o ciclo coa obra ‘Enredadas’, unha divertida comedia coral onde as vidas de varias mulleres entrecrúzanse a través de situacións cómicas e enredos inesperados, ofrecendo unha reflexión sobre a amizade, o amor e as relacións no mundo contemporáneo.
As entradas para cada unha das funcións estarán dispoñibles para a súa reserva no Departamento de Cultura durante a semana previa a cada obra. As persoas interesadas tamén poderán facer a súa reserva chamando ao teléfono 630 907 124. Ademais, este ciclo teatral conta co apoio da Deputación da Coruña.
