Con motivo do remate da tempada, o presidente do Consello Regulador da Agricultura Ecolóxica de Galicia (Craega), Francisco López Valladares, reuniuse esta mañá en Monforte de Lemos co presidente do equipo ciclista Louriña, Juan José Álvarez; co director deportivo do Club, Vicente Giner, e cun dos corredores do equipo adaptado Lasal Cocinas-Craega, Damián Ramos, que recentemente gañou unha medalla de bronce nos Xogos Paralímpicos de París, nunha proba de en contra o reloxo, na CRI C4.
As sensacións do equipo unha vez rematada a tempada foron boas, con diversos resultados destacados nas diferentes categorías do Club. Durante este ano, participaron en máis de setenta probas a nivel nacional. O número de licencias que expediron roldan, aproximadamente, as 140.
Tanto a categoría masculina, como a feminina e a adaptada do Louriña participaron na Copa de España e nas probas máis importantes que se disputaron. De feito, no ránking nacional, o equipo masculino conseguiu quedar en sexta posición. Este Club, que durante o ano que vén celebra o seu décimo aniversario, foi o único de toda España en enviar a tres xuvenís aos mundiais.
O presidente do equipo expresou que “nos gustaría que cada unha das seccións que temos chegue ao seu máximo nivel e, ademais, formar os ciclistas para que poidan vivir disto e ensinarlles os valores deste deporte”. Así mesmo, tamén engadiu que “se trata dun Club moi familiar, mais non todo vale”.
Damián Ramos contounos como se sentiu ao conseguir a medalla de bronce nos Xogos Paralímpicos: “Foi unha experiencia moi positiva. Gustaríame ir aos vindeiros Xogos, en Los Ángeles”. Para poder participar, Damián tivo que gañar o ránking previamente.
De cara a vindeira tempada, buscan continuar mellorando como equipo e seguir disputando diferentes probas a nivel nacional e internacional, logrando uns resultados sobresaíntes, tal e como narrou Juan José Álvarez.
“Estamos satisfeitos cos resultados da tempada e seguiremos apoiando e fomentando o deporte en xeral”, afirmou Valladares durante o desenvolvemento da reunión. O Craega busca, co patrocinio ao Club, que a práctica do deporte e a ilusión dos mozos siga viva.
