No pleno ordinario do pasado 8 de outubro os concelleiros de AporM presentaron unha moción de urxencia pedindo á Corporación que rexeitara a instalación do parque eólico do Coto de Eira.
Antes de que o portavoz de AporM puidera explicar os motivos polos que solicitaba o debate da moción e de que puidera explicar o seu contido, PP, BNG e PSOE cuestionaron que a iniciativa fose tratada como unha moción. O novo alcalde do PP expresou o seu desacordo con alegar contra o parque eólico sen antes falar coas Comunidades de Montes das parroquias afectadas, debido a que había intereses económicos de por medio e non se podía rexeitar “porque si”. O portavoz de AporM intentou explicar as afeccións patrimoniais que ten o proxecto do parque eólico e que a urxencia do asunto viña dada porque o prazo de alegacións remataba o 23 de outubro, o resto de grupos, BNG e PSOE aceptaron o argumento do PP para deixar o asunto “sobre a mesa ata que falen cos veciños”.
O grupo de AporM está de acordo e tratar o tema cos veciños e comunidades de montes de Sabaxáns e Gargamala, xa que serán os principais afectados por esta intervención, pero non debemos esquecer que no 2008 a Xunta de Galicia tiña planificado incluír o Coto de Eira dentro da Rede Natura da UE, algo que finalmente descartou no 2012.
Mentres, outros concellos xa iniciaron a tramitación das alegacións contra os parques eólicos que a Xunta impón sobre os seus territorios (por exemplo nas Neves, onde outra empresa quere construír un parque eólico en Sanomedio), o grupo AporM lamenta que en Mondariz teñamos que esperar a que o actual Goberno apoiado polo BNG e polo PSOE se poña de perfil diante da protección dos monumentos naturais máis prezados de Mondariz, desde onde se ve a ría de Vigo.
Impacto paisaxístico
O parque eólico do Coto de Eira prevé instalar 10 aeroxeradores de 101 metros de altura (158 m se incluímos as hélices) arredor do Coto de Eira, así como a solicitude da inclusión
do mesmo espazo na Rede Natura 2000, tal e como propuxera a Xunta de Galicia en 2012.
Para AporM é innegable o valor natural, cultural e paisaxístico do Coto de Eira e por iso se considera urxente a súa protección. Ademais o planeamento urbanístico de Mondariz, desde o ano 1999, cualifica o Coto de Eira como Solo Rústico de Especial Protección Forestal, o que impide a construción ou instalación de infraestruturas alleas ás forestais.
O estudo de impacto ambiental presentado pola empresa promotora ignora a existencia de mananciais de auga e petróglifos como os da Fonte Santa, de bens etnográficos como a Choza de Martín Rodríguez ou O Corral Vello ou da Pedra do Bufo, unha ave rapaz nocturna incluída no Catálogo Galego de Especies Ameazadas.
