As solicitudes poden presentarse até o domingo 17 de novembro ás 23.59 h
O Concello de Tui pon en marcha nas próximas semanas un ambicioso programa de mentoring destinado a guiar ao comercio local no seu proceso de dixitalización, promovendo a adaptación ao entorno dixital e a mellora da súa competitividade. Esta iniciativa, que forma parte do Plan de Recuperación, Transformación e Resiliencia financiado pola Unión Europea – NextGenerationEU, reafirma o compromiso do Concello co apoio aos comerciantes locais e coa transformación dixital da economía do municipio.
Oportunidades e ferramentas para o comercio tudense
A través deste programa, o Concello de Tui ofrecerá 25 prazas para comercios locais, que recibirán asesoramento personalizado e formación de alta calidade para optimizar a súa presenza en liña, mellorar a eficiencia dos seus procesos e garantir a ciberseguridade das súas operacións. O equipo de expertos en dixitalización encargado do programa realizará inicialmente unha análise exhaustiva da situación actual de cada negocio participante para determinar o seu nivel de madurez dixital e identificar áreas de mellora.
Posteriormente, desenvolverase un plan de acción personalizado para cada comercio, que incluirá propostas específicas en función dos obxectivos e necesidades de cada negocio. Estas propostas abordarán aspectos como a mellora da presenza en liña, o uso de novas tecnoloxías, a optimización de procesos e a implementación de ferramentas de ciberseguridade.
Acompañamento experto e personalizado
Os comercios seleccionados contarán tamén con sesións de mentoring individualizado, nas que recibirán orientación e apoio para implementar o seu plan de acción dixital. Este acompañamento permitirá que cada comercio poida adaptar as recomendacións á súa realidade específica, guiándoo paso a paso durante todo o proceso de transformación.
Requisitos de participación e inscrición
Este innovador programa está aberto a pemes e persoas autónomas do sector comercio (epígrafes CNAE 45, 46, 47 e IAE 61-66) que dispoñan dun local comercial en Tui. As inscricións estarán abertas até o domingo 17 de novembro ás 23.59 horas debendo presentar o documento de solicitude de inscrición – dispoñible en tui.gal – por rexistro de entrada presencialmente na casa do concello ou a través de instancia xeral na sede electrónica. Entre as solicitudes recibidas, farase unha selección baseada no nivel de madurez dixital, o emprego asociado e, en caso de empate, a orde de inscrición.
Sobre o programa e a súa importancia para o futuro do comercio local
O Concello de Tui traballa activamente para axudar ao comercio local a afrontar con éxito os desafíos do mercado dixital actual. Con esta iniciativa, financiada polo Ministerio de Economía, Comercio e Empresa, Tui reafirma o seu compromiso de apoio ao comercio e a súa aposta pola modernización e resiliencia dos negocios locais, garantindo que conten coas ferramentas necesarias para crecer nunha economía cada vez máis dixital.
Para máis información as persoas interesadas poden contactar coa Concellería de Comercio do Concello Tui no correo electrónico comercio@tui.gal ou no teléfono 618 78 59 98.
Este programa de mentoring representa unha oportunidade única para o comercio de Tui, que poderá afrontar con maior seguridade e preparación o camiño cara á dixitalización, fortalecendo a súa posición no mercado e mellorando a súa relación coa clientela nun entorno cada vez máis dixital.
