● O ´trail runner´de Atios logrou un impresionante podium absoluto na Pontevedra Trail League 2024, quedando en primeiro lugar no Trail Aloia, segundo no Trail Muiños do Folón e primeiro no Trail do Tegra
Este domingo, David Porto, veciño de Atios, alzouse coa vitoria no Trail do Tegra, unha das probas máis esixentes do calendario galego de carreiras de montaña. A carreira, disputada nos esixentes sendeiros da Guarda, converteuse nunha das competicións máis esperadas da tempada, e Porto, quen compite coa camiseta do AC Castelos Trail, deixou claro unha vez máis o seu alto nivel.
Este triunfo é o broche de ouro a un ano espectacular para David Porto, quen colleitou éxitos en varias competicións de renome. O trail runner centrouse na Pontevedra Trail League 2024, unha liga que engloba tres das probas máis importantes da provincia: o Trail do Aloia (Tui), o Trail Muiños do Folón (O Rosal) e o Trail do Tegra (A Guarda). Porto, tras un ano de duros adestramentos, logrou un impresionante podium absoluto, quedando en primeiro lugar no Trail Aloia, segundo no Trail Muiños do Folón e primeiro no Trail do Tegra, consolidándose como un dos mellores corredores de montaña da provincia.
A vitoria no Trail do Tegra
Na xornada deste domingo, Porto enfrontouse a un dos circuítos máis esixentes da tempada. A pesar de chegar con molestias nos nocellos, o porriñés non deixou que iso lle restase opcións. Durante os primeiros quilómetros, mostrouse prudente, tenteando aos seus rivais e xestionando as súas forzas, especialmente nas baixadas, onde decidiu reservar algo de enerxía. Con todo, a partir do quilómetro 8, Porto cambiou o ritmo e, cunha impresionante aceleración, comezou a despegarse dos seus competidores. Nese momento, o atleta de AC Castelos Trail marcou unha clara diferenza, alcanzando a liña de meta con 2 minutos de vantaxe sobre o segundo clasificado, o que demostra non só o seu nivel como corredor, senón tamén a súa capacidade táctica.
O seu triunfo enmárcase no continuo crecemento do seu club, AC Castelos Trail, fundado en 2022 por un grupo de amigos da zona do Condado e o Val da Louriña. Na súa curta traxectoria, o club destacou en diversas competicións, especialmente no Campionato Galego por Equipos en Carreiras de Montaña. No últimos tres anos, lograron posicionarse entre os mellores, cun terceiro posto en 2022, outro terceiro posto en 2023, e este ano, un segundo posto na categoría masculina e un terceiro posto na categoría feminina.
