• O último informe de Ecoembes sinala que no municipio cada vez se recicla máis.
• A recollida de envases lixeiros no ano 2023 alcanzou un valor de 59.320 quilogramos, o que supón uns 19,93 quilos por habitante, chegando a un 40,7% mais en quilogramos que no 2016 no contedor amarelo.
• O Concello aumentou os contedores amarelos e os de papel/cartón a través dun convenio entre Ecoembes e a Xunta de Galicia.
Os esforzos que o goberno local de Laxe está a facer para mellorar a recollida selectiva de residuos están a dar os seus froitos, mellorando os datos neste sentido.
O Alcalde, Francisco Charlín, mantivo unha reunión cos técnicos de Ecoembes, entidade medioambiental sen ánimo de lucro centrada na mellora contínua na reciclaxe municipal así como para coñecer as novidades en ecodeseño dos envases en España, estes lle trasladaron un informe cos últimos datos do municipio.
En base ao documento, Laxe mellora en 4,8 puntos a media galega na aportación de envases lixeiros cun promedio de 19,9 kg por habitante ao ano fronte ao promedio de 15,1 autonómico. Tamén mellora en 6 puntos a aportación de residuos de papel e cartón, situándose en 19,6 kg fronte á media galega, de 13,6 kg.
O Alcalde explica que “ademais de ser boas novas para o medio ambiente tamén o son para a economía xa que, coa boa separación do lixo e un bo uso do colector de envases lixeiros, redúcese o peso e por tanto pódese reducir o coste da recollida do colector xenérico”.
É por iso, que agradece a colaboración e esforzo dos veciños, e anímaos a seguir facendo un uso correcto dos contedores.
