O presidente provincial, Luis Menor, destaca a “inmensa labor” desta organización social coas familias vulnerables, durante unha visita ao almacén da entidade no polígono de San Cibrao das Viñas
A través do Inorde, a institución provincial coordina a entrega de produtos cultivados nos campos experimentais de A Limia
A Deputación de Ourense entregou esta mañá 10.000 quilos de patacas de A Limia ao Banco de Alimentos de Ourense. O presidente provincial, Luis Menor, visitou as instalacións que esta organización sen ánimo de lucro ten no polígono de San Cibrao das Viñas. Acompañado polo presidente do Instituto Ourensán de Desenvolvemento Económico (Inorde), Rosendo Fernández, e traballadores do Centro Agrogandeiro da Deputación, supervisou a entrega desta doazón, no marco dunha cooperación que mantén a institución provincial e o Banco de Alimentos, que asiduamente entrega produtos cultivados nos campos de ensaio da Limia.
Esta entrega está previsto que se complete a final do ano con outros 10.000 quilos de patacas de A Limia, co obxectivo de reforzar a colaboración que a Deputación mantén co Banco de Alimentos de Ourense.
O presidente provincial, Luis Menor, destaca a labor “inmensa” que realizan no Banco de Alimentos de Ourense dende hai máis de dúas décadas, co obxectivo de que moitas familias sen recursos poidan ter acceso a alimentos básicos.
Ademais, a Deputación de Ourense colabora habitualmente con esta organización social ante emerxencias destacadas, como ten sido o envío de doazóns a Ucraína ou, máis recentemente, aos afectados da DINA. Neste sentido, o goberno provincial lembra a importancia de “cauces oficiais e organizados” de axuda ante catástrofes, como é o caso de entidades como o Banco de Alimentos de Ourense, que permiten que a axuda sexa eficaz e chegue aos afectados por calquera emerxencia deste tipo.
A entrega de patacas forma parte das accións que a Deputación realiza desde hai dez anos en colaboración con Cáritas Ourense, organizando un curso de actividades básicas en agricultura no que, ademais de formar a dez alumnos por ano no ámbito do sector primario, contribúese á inclusión. O comedor social de Cáritas en Ourense recibe os produtos recollidos nos cultivos que se realizan nas prácticas de campo.
