As instalacións do Centro de Día de Lousame acolleron na tarde do martes unha xornada de encontro interxeracional entre alumnado do CPI Cernadas de Castro e as persoas maiores usuarias deste centro asistencial. Un evento incluído dentro dun proxecto do centro educativo, denominado “Voluntariado miúdo”, e no que participou todo o alumnado de Infantil e o de 6º de Primaria.
A concelleira de Cultura, Silvia Agrafojo, agradeceu a colaboración ofrecida tanto por parte do colexio como por parte do Centro de Día xa que “a relación interxeracional é moi importante porque antes si que os avós e avoas intercambiaban saberes cos seus netos e netas, pero agora xa non é tan común. E se queremos saber quen somos, temos que saber de onde vimos. Por iso a relación entre nenos e maiores é moi enriquecedora”.
Os pequenos aproveitaron a xornada para facer distintas actuacións para os maiores, cantando panxoliñas e rematando cunha foliada na que todos e todas bailaron ao ritmo de cancións de Nadal. A maiores, a rapazada de 2º de Primaria, que non puido asistir á celebración, envioulles aos usuarios do centro de día unha postal de Nadal elaborada na clase e que recollía a seguinte mensaxe: “Nestas datas tan especiais, os nenos e nenas de 2º de Primaria queremos felicitarlles as festas. Bo Nadal e feliz 2025. Que os seus desexos se cumpran. Unha aperta”.
