O director xeral de Comercio e Consumo, Gabriel Alén, o rexedor, Luís Pérez, o segundo tenente de alcalde, Franciso Suárez, a concelleira de Promoción Económica Genoveva Betanzos e o presidente da Asociación de Empresarios, Francisco Martínez, realizaron unha visita ao mercado municipal para promover os produtos frescos de proximidade e animar á poboación a consumir nos comercios da localidade.
O alcalde agradeceu a visita argumentando que “é un motivo de alegría que dende a Xunta de Galicia veñan a Ribeira para recoñecer a calidade dos produtos frescos como o peixe e o marisco”. Pérez Barral argumentou que é necesario que todas as administracións vaiamos da man para potenciar o comercio de proximidade ao tempo que se promove a calidade dos seus produtos”.
Aposta de Riberia polo comercio local
Luís Pérez manifestou o compromiso do Goberno local polo comercio e a hostalaría da localidade. Neste sentido o Concello está a facer unha forte aposta polo comercio local, achegando 45.000 euros anuais á Asociación de Empresarios para a promoción do comercio de proximidade e tamén dende as concellerías de Cultura, Festexos, Mercados e Promoción Económica estase a facer un forte investimento neste Nadal para que a veciñanza de Ribeira poida gozar de máis de medio cento de actividades tanto no centro urbano como nas parroquias.
“Dende o Concello estamos invistindo máis de 250.000 euros para que a veciñanza teña todo tipo de actividades, lúdicas, culturais e festivas promovendo que as rúas estean cheas de vida, e polo tanto, para que o comercio local reluza de dinamismo nestas datas”.
Para finalizar Barral animou á veciñanza e aos visitantes a mercar en Ribeira porque ademais de levar produtos de calidade para a casa, axúdase aos veciños e veciñas xerando un impacto económico positivo na localidade.
