A través de estadías 100% gratuítas, os participantes pasan desde Noiteboa ata Reis nas residencias do Carballiño e Panxón
Asegura que é unha forma de “devolver un pouco” de todo o que os maiores “aportaron” á sociedade ao longo da súa vida
Agradece o labor de todos os traballadores e voluntarios por facer posible que se leve a cabo este programa
O Goberno autonómico reforza o seu compromiso de atender as necesidades das persoas maiores, así como de fomentar o envellecemento activo e combater a soidade non desexada
O presidente da Xunta, Alfonso Rueda, salientou hoxe o éxito do programa Xuntos polo Nadal, que este ano permite que 270 persoas maiores que viven soas desfruten destas datas acompañadas. “O que vos une a todos é as ganas de pasar as festas en compañía e pasándoo ben”, indicou o titular do Goberno autonómico.
Durante unha visita a residencia de Tempo Libre de Panxón -na que pasan as festas 140 maiores- e acompañado da conselleira de Política Social e Igualdade, Fabiola García, Rueda subliñou que se trata dunha iniciativa con máis de 20 anos de historia coa que a Xunta busca “devolver un pouco do moito” que “aportaron os maiores” á sociedade ao longo da súa vida. Ademais, agradeceu o labor de todos os traballadores e voluntarios por facer posible que se leve a cabo.
Xuntos polo Nadal é un programa dirixido aos maiores de 60 anos para que poidan desfrutar dunha estancia con pensión completa gratuíta neste centros e participar en diferentes actividades como baile, ximnasia, obradoiros ou excursións. Así, a través de estadías 100% gratuítas, os participantes pasan desde Noiteboa ata Reis nas residencias de Tempo Libre do Carballiño e Panxón (Nigrán).
Fomento do envellecemento activo
A Xunta leva anos comprometida con atender as necesidades dos maiores, así como de fomentar o envellecemento activo e combater a soidade non desexada. Nesta liña, cómpre salientar a futura Estratexia Galega de Atención á Soidade non Desexada na que está a traballar o Executivo autonómico con entidades sociais e concellos, así como iniciativas como o Carné +65 que permite desfrutar de descontos en servizos, establecementos ou lecer; a gratuidade no transporte público da Xunta para os maiores de 65 desde o pasado mes de xaneiro; ou as aulas sénior e convenios coas tres universidades para aquelas persoas que queiran seguirse formando.
