A inscrición para a proba organizada polo Concello está aberta, así como a da carreira 5K que terá lugar en paralelo
O Concello da Coruña fai público este luns o percorrido do Medio Maratón C21 que se celebrará o vindeiro 9 de febreiro. “Esta é unha das probas máis atractivas deste formato que se celebran a nivel nacional e desde o Goberno de Inés Rey levamos tempo potenciándoa e deseñamos un percorrido que permita aos e ás atletas de elite obter boas marcas”, sinalou o concelleiro de Deportes, Manuel Vázquez.
O Concello da Coruña e a Federación Galega de Atletismo organizan esta décimo sétima edición da C21, que conta cunha distancia homologada de 21.097,50 metros. A proba está incluída no calendario oficial das competicións da FGA e da Real Federación Española de Atletismo e disputarase nun circuíto totalmente urbano e cunhas características propicias para que as persoas participantes poidan bater as súas marcas.
O medio maratón manterá o percorrido das dúas últimas edicións. As persoas participantes comezarán e concluirán a C21 no Obelisco. A primeira parte transcorrerá por Ramón y Cajal, Salvador de Madariaga e o porto coruñés. Na segunda, os atletas percorrerán as praias de Riazor, Orzán e Matadoiro polo paseo marítimo e atravesarán a rúa San Andrés para ir ata Porta Real e, desde alí, chegar á meta.
Por outra banda, o Goberno de Inés Rey volve apostar nesta edición polo desenvolvemento en paralelo dunha proba de 5 quilómetros que lle permitirá ás persoas participantes gozar do ambiente do medio maratón e aclimatarse á distancia habitual do circuíto de carreiras populares Coruña Corre, que comeza o próximo mes de marzo.
A inscrición para ambas probas está aberta a través da páxina web de Carreiras Galegas. No día de hoxe hai case un milleiro de persoas inscritas na C21, mentres que o número de participantes na carreira 5K supera os 500 inscritos. A proba repartirá máis de 15.000 euros en premios para os mellores clasificados, incluíndo un premio especial de 1.000 euros á persoa que consiga bater o récord da C21, fixado en 1 hora, 1 minuto e 40 segundos na categoría masculina e 1 hora, 11 minutos e 16 segundos na categoría feminina. Na edición de 2024 os gañadores foron Pablo Sánchez e María Azucena Díaz.
