• Uns premios que recaeron, na categoría adulta, en Rosalía Otero Couñago cun total de 89 préstamos e, na categoría infantil e xuvenil, en Noel Castro con 377 préstamos.
• Soutomaior aparece como o décimo concello de toda Galicia con maior número de préstamos na súa Biblioteca cun total de 1500 préstamos por cada 1000 habitantes.
Hoxe, 11 de xaneiro, celébrase o Día das Persoas Usuarias das Bibliotecas en Galicia, unha xornada que se conmemora hoxe porque foi o día no que se inaugurou a Biblioteca de Galicia na Cidade da Cultura no ano 2011.
A Biblioteca Municipal de Soutomaior celebrou onte por vez primeira este día agasallando ás persoas máis lectoras nas súas respectivas categorías, un premios que foron entregados polo alcalde, Manu Lourenzo, e pola conselleira de Cultura, Silvia Cernadas. O premio na modalidade infantil-xuvenil consistiu nun lote de xogos de mesa e papelería e, na modalidade de adultos, nunha cesta de produtos locais elaborados en Soutomaior. Ademais, ambas persoas premiadas levaron unha lámina da artista local Alba Troiteiro. Na categoría de adultos, a premiada foi Rosalía Otero Couñago cun total de 89 préstamos e, na categoría infantil e xuvenil, Noel Castro, cun total de 377 préstamos.
Ademais, a Consellería de Cultura deu a coñecer un estudo que cuantifica o beneficio social das bibliotecas públicas e onde Soutomaior aparece coma o décimo concello de toda Galicia con maior número de préstamos: un total de 1500 préstamos por cada 1.000 habitantes. O dato é significativo, pois non só se refire ás bibliotecas públicas municipais, senón que tamén recolle todas as bibliotecas públicas das grandes cidades.
As bibliotecas con maior número de préstamos son: Ortigueira (2105 préstamos), Beariz (2044), Oleiros (1940), Neda (1918), A Coruña (1737), Santiago (1672), A Mezquita, (1594), Ourol (1559), Nigrán (1557) e Soutomaior (1500), que aparece neste listado superando a Leiro, O Porriño, Pontedeume, Rodeiro, Lugo, Salceda de Caselas, Pontevedra, Ourense, Covelo, Cedeira, Corcubión, Cambre, Padrón, Ribadeo e O Grove.
Soutomaior ten unha relación de 4.629 documentos na biblioteca municipal por cada 1.000 habitantes (cun total de máis de 35.000 volumes) e 67 adquisicións por cada 1.000 habitantes.
O 43,94% da poboación do Concello está inscrita na biblioteca (hai 3.500 persoas usuarias), porcentaxe que vai subindo de forma significativa, estando xa entre o grupo de concellos con maior porcentaxe de persoas inscritas.
Ademais, só en 69 concellos galegos as bibliotecas abren máis de 260 días ao ano, o que equivale a cinco días á semana (sen contar festivos e vacacións). E Soutomaior é un deles con 264 días de apertura ao ano.
A concelleira de cultura, Silvia Cernadas, quixo agradecer a implicación dos veciños e das veciñas de Soutomaior, así como de todo o persoal da biblioteca municipal e do concello que fan posible que a Biblioteca “Luís Seoane” de Soutomaior sexa un centro cultural de referencia polo número de visitas, préstamos, subvencións e premios acadados.
