Trátase do programa “Rosalía, a súa casiña, o meu lar”, a iniciativa en colaboración coa Fundación Rosalía de Castro á que a institución provincial destina máis de 30.000 euros e que abre este martes o prazo de solicitude
A Deputación de Pontevedra abre este martes 14 de xaneiro o prazo para que ata 40 centros educativos da provincia poidan participar no programa “Rosalía, a súa casiña, o meu lar”, impulsado pola institución provincial en colaboración coa Fundación Rosalía de Castro. Trátase dunha iniciativa para que o alumnado da provincia coñeza a riqueza cultural da colección da Casa- Museo de Rosalía en Padrón, o intenso labor que desenvolve e se achegue á figura e legado da autora. Deste xeito, a Deputación destina a esta iniciativa 32.500 euros e farase cargo tanto dos custes da entrada como do transporte do alumnado dende os centros de ensino da provincia ata a Casa de Rosalía en Padrón. A Deputación reforza así a súa aposta por divulgar a figura e o legado da autora, aumentando o orzamento con respecto ao pasado ano, no que se destinaron 27.100 euros a esta iniciativa, para que poidan realizar as visitas máis centros (40 fronte a 35).
A visita, guiada polo persoal do Departamento de Educación da Casa-Museo, estará apoiada no material didáctico enviado previamente a cada centro educativo e adaptado a cada etapa (Primaria, ESO e Bacharelato). No seu percorrido, o alumnado coñecerá os acontecementos que marcaron a vida e a obra de Rosalía. Así, na planta baixa, denominada “O perfil dunha sombra”, os escolares poderán apreciar a dimensión desta emblemática figura da cultura galega e universal: a súa vida, a contorna que a rodeou e a relación do pobo galego coa figura da escritora, mentres que na primeira planta, denominada “O seu”, vivirán unha recreación da casa rural da época, entre labrega e fidalga. Ademais, durante o transcurso da visita, realizarase unha proxección audiovisual sobre a figura de Rosalía, que rematará coa entrega ao centro de varios volumes literarios da autora.
Os centros educativos interesados en beneficiarse de “Rosalía, a súa casiña, o meu lar” deberán, en primeiro lugar, concertar as vistas co departamento de Educación da Casa-Museo a través do correo fundacion@rosaliadecastro.gal ou do teléfono 981 811 204. Unha vez acordada a cita, terán que presentar a súa solicitude a través da Sede Electrónica da Deputación a partir deste martes, 14 de xaneiro, e nun prazo máximo dun mes.
