- Para a rexedora redondelá, as declaracións do deputado popular José Luis Ferro o único que fan é “branquear o franquismo, actuando como cómplice da ultradereita e boicoteando o acordo pola Memoria Democrática”. No próximo pleno da Corporación proporase a declaración de Ferro Iglesias como “persoa non grata en Redondela”.
- A alcaldesa de Redondela lamenta o silencio do PP de Redondela e confía en que a formación se pronuncie facendo pública “a súa consideración sobre o pasado de San Simón e a súa posta en valor como Lugar de Memoria Democrática”.
A alcaldesa de Redondela, Digna Rivas, critica a actitude do Partido Popular de Galicia, que onte negou no Parlamento autonómico a represión franquista na Illa de San Simón. Para a rexedora redondelá, as declaracións do deputado popular José Luis Ferro Iglesias “branquean o franquismo, actuando como cómplice da ultradereita e boicoteando o acordo pola Memoria Democrática”. Rivas fai referencia á intervención do deputado do PP na que asegurou que o Goberno galego “non tiña constancia de que houbese mortes na illa”. A alcaldesa sinala que se trata “dun ataque aos valores democráticos e a convivencia política”, chegando a situarse en contra dunha verdade histórica, “como é o uso da illa de San Simón como campo de concentración polo franquismo”. A intervención tivo lugar durante o debate dunha proposición non de Lei na primeira Comisión do ano no Parlamento para reclamar a constitución do Consello da Memoria Democrática de Galicia. Digna Rivas anuncia que no próximo pleno da Corporación proporase a declaración de Ferro Iglesias como “persoa non grata en Redondela”.
Rivas insiste en a Illa de San Simón “é un dos lugares da represión franquista máis emblemáticos de Galicia, no que milleiros de persoas foron encerradas inxustamente e sometidas a tortura e trato inhumano”. A alcaldesa sinala que a dramática historia de San Simón “é ben coñecida pola veciñanza de Redondela e bisbarra”, así como a “solidariedade de moitas mulleres que actuaban como madriñas dos presos”, un colectivo ao que o Concello homenaxeou. Rivas defende que é fundamental que todas as administracións “leven a cabo accións públicas dirixidas ao coñecemento da nosa historia e o fomento da memoria democrática”, como fai o Concello de Redondela.
A alcaldesa de Redondela lamenta o silencio do PP de Redondela, representado no parlamento galego polo redondelán Alberto Pazos, e confía en que a formación local se pronuncie facendo pública “a súa consideración sobre o pasado de San Simón e a súa posta en valor como Lugar de Memoria Democrática”.
