Xa están rematadas as beirarrúas e instalado o arboredo na parte da baixa da rúa. O luns os traballos de renovación do firme obrigarán ao corte ao tráfico da rúa durante seis semanas
O Concello comenza o luns da vindeira semana unha nova fase dos traballos de reurbanización da rúa Pla y Cancela, que suporán a ampliación das zonas peonís, así como a renovación da rede de recollida de augas residuais, a creación dunha nova rede de recollida de augas pluviais nun tramo de Juan Castro Mosquera, novo arboredo e especies vexetais e a instalación de novo mobiliario urbano. Esta actuación enmárcase dentro da estratexia do Goberno de Inés Rey de dotar os barrios da Coruña de novos espazos urbanos de calidade centrados no seu uso peonil.
As novas beirarrúa e arboredo xa están instalados na parte baixa da rúa, na zona de Inés de Castro e Cuesta da Unión. A renovación do firme da rúa comezará o vindeiro luns, o que obrigará ao corte ao tráfico da mesma durante un período estimado de seis semanas. Mentres se leven a cabo os traballos de formigonado nesa parte da rúa, seguirase coa construción de novas beirarrúas e instalación de arboredo na parte alta, desde Inés de Castro cara a rolda de Nelle e avenida de Arteixo.
Mentres duren os traballos permitirase o tránsito de viandantes polos itinerarios marcados e tamén saída e acceso a garaxes situados na rúa.
Na rúa Pla y Cancela estanse a ampliar as beirarrúas para mellorar a súa accesibilidade nas zonas de máxima pendente. Concretamente, trabállase no tramo comprendido entre os números 26 e 28, así como no cruzamento coa rúa Juan Castro Mosquera e nos pasos de cebra de dito espazo, elevándose ata un total de seis. Para mellorar a accesibilidade manteranse os aparcadoiros en liña en ambas as marxes entre os cruzamentos de Juan Castro Mosquera e Costa da Unión. Por outra banda, crearanse novos aparcadoiros na rúa Juan Castro Mosquera, que pasará a ser dun só sentido de circulación e estacionamento en batería e ambas as marxes. Tamén se renovará o pavimento de toda a rúa.
Por outra banda, a rede de saneamento de augas residuais está xa renovada, tanto en Pla y Cancela como na rúa Juan Castro Mosquera. Nesta última tamén se creará unha rede separativa de recollida de augas pluviais. No cruzamento entre Pla y Cancela con Juan Castro Mosquera simplificarase a incorporación de vahiculos e crearase unha estancia pública con novas zonas verdes e mobiliario. Tamén se mellorará a accesibilidade e seguridade das paradas do autobús con nova sinalización na vía e a ampliación da beirarrúa. Tamén se ampliarán as ablaqueacións do arborado existente para evitar o levantamento das beirarrúas e se instalarán novos bancos ao longo de Pla y Cancela.
A superficie total ma que se está a actuar é de 6.500 metros cadrados, ascendendo as zonas verdes e beirarrúas a 3.170 e a calzada a 3.400 metros cadrados. O orzamento ascende a 1,1 millóns de euros, financiados a través de fondos europeos Next Generation.
