Membros da asociación fixéronlle entrega ao presidente do cadro que adquiriu na celebración do 40 aniversario do centro
O presidente da Xunta, Alfonso Rueda, recibiu esta semana a usuarios do Centro Juan María, referente no eido da inclusión das persoas con discapacidade intelectual. Neste encontro fixéronlle entrega do cadro adquirido polo titular do Executivo autonómico o pasado 7 de novembro na poxa que tivo lugar na celebración do 40 aniversario desta asociación.
Rueda, que estivo acompañado pola conselleira de Política Social e Igualdade, Fabiola García, mantivo un encontro con Brian Dacuña, autor da obra que loce xa no despacho do presidente do Goberno galego, e os seus compañeiros Lourdes Alonso e Sergio Fernández. Tamén participaron na xuntanza o presidente do Centro Juan María, Manuel González, e outros representantes da entidade.
O Centro Juan María, con sede en Nigrán, traballa a prol das persoas con discapacidade intelectual e conta con servizos de calidade, como son o centro educativo, de día e ocupacional, ou centro especial de emprego.
