Nos últimos nove anos recolléronse no noso concello un total de 719.028,46 quilos de téxtil, que equivalen a 2,8 millóns de prendas
A veciñanza do noso concello depositou o ano pasado nos contedores da Fundación Humana 89.545,46 quilos de roupa (un 8,55% máis que no 2023), que equivalen a 358.182 prendas. Os residuos de téxtil van en aumento, e, de feito, no 2024 acadouse a cifra máis alta desde que empezou a recollida selectiva deste tipo de residuos, mesmo superando o récord do ano da pandemia.
Nos nove anos que levan instalados os colectores no noso concello, os carballeses e carballesas temos depositado 719.028,46 quilos de roupa e calzado, é dicir, 2,8 millóns de prendas, que doutro xeito acabarían na incineradora de Sogama, tal como apunta o concelleiro de Medio Ambiente e Servizos, Miguel Vales, ademais de sinalar que a xestión axeitada deste residuo reverte na sociedade a través de programas de cooperación ao desenvolvemento en África, América Latina e Asia.
Nestes momentos contamos con 34 puntos de recollida de téxtil, 15 deles situados na zona rural. Carballo conta cun contedor por cada 1.000 habitantes, mentres que a media española é de un por cada 5.000. Os máis utilizados son os situados na rúa Perú, xunto ao Centro Comercial Bergantiños; na avenida do Ambulatorio e na rúa Eduardo Pondal.
Nos colectores de Humana podemos depositar roupa, calzado, complementos e téxtil de fogar que non usamos e que deste xeito poden ter unha segunda vida, ademais de contribuír ao desenvolvemento de proxectos sociais. Ademais, o servizo é gratuíto, representa un aforro importante na xestión dos residuos sólidos urbanos e contribúe á redución das emisións de CO2: por cada kg de roupa recuperada evítase a emisión de 6,1 kg de CO2, segundo un estudo da Federación Humana People to People. Deste xeito tamén estamos a colaborar na protección do medio ambiente e na loita contra o cambio climático.
