• O alcalde mantivo este martes a súa primeira reunión con Luís López, na que se analizaron os proxectos impulsados a través do programa +Provincia 2024, ademais de dar traslado doutras propostas para o futuro
• O rexedor confirmou que o Concello solicitará ao Estado a cesión demanial dos terreos necesarios para acometer a humanización da Travesía Doña Urraca coa colaboración da Deputación de Pontevedra
O alcalde de Caldas de Reis, Jacobo Pérez, mantivo este martes a súa primeira reunión desde a súa chegada á Alcaldía co presidente da Deputación de Pontevedra, Luís López. Un encontro que, en palabras do propio rexedor, estivo marcado “pola boa sintonía e o interese de ambas administracións á hora de impulsar proxectos que sirvan para mellorar a calidade de vida da veciñanza, reafirmando a Caldas como un municipio de referencia na bisbarra e en toda a provincia de Pontevedra”. Pérez agradeceu a celeridade do presidente á hora de concretar esta reunión, na que se abordaron varios puntos de interese. En primeiro lugar, revisáronse os proxectos impulsados a través do Plan +Provincia 2024 da Deputación, dúas obras moi ambiciosas para dotar de saneamento a diferentes puntos do municipio. Ademais, tamén se falou do Plan de Infraestruturas Deportivas, a través do cal Caldas de Reis quere levar a cabo a renovación dos vestiarios do pavillón municipal, gañando, ademais, máis espazo para equipamento.
De cara a 2025, Jacobo Pérez trasladou a Luís López o compromiso do Concello para axilizar e desbloquear a ansiada humanización da Travesía de Doña Urraca. Segundo explicou o alcalde, existe predisposición por parte da Deputación de Pontevedra para avanzar neste proxecto. Sen embargo, é necesario conseguir a cesión demanial duns terreos próximos ao cuartel da Garda Civil, que son de titularidade do Ministerio de Interior. Pérez confirmou que a Administración local solicitará a devandita cesión e, unha vez conseguida, porase a disposición da Deputación, para que se poida acometer a obra. A intención é asinar un convenio no que o Concello asumirá o 30% da contía, cuxo total podería superar os 500.000 euros. “Estamos a falar dunha actuación moi necesaria e demandada e queremos facela realidade”, recalcou o alcalde caldense.
Durante a reunión tamén quedou aberta a opción de impulsar máis convenios no futuro para realizar máis actuacións, especialmente no apartado de infraestruturas. En todo caso, Jacobo Pérez deixou claro que “hai que ir paso a paso”. Outro tema do que se falou na reunión foi do mantemento das estradas provinciais no concello. Solicitouse o cambio de emprazamento dunha marquesiña de autobús na estrada de San Clemente, así como medidas para garantir o cumprimento das marxes de seguridade das árbores situadas nas parcelas colindantes á vía.
En definitiva, Jacobo Pérez amósase satisfeito polo resultado desta reunión e incide en que “tal e como xa deixamos claro en varias ocasións, a nosa folla de ruta pasa por mellorar a calidade de vida da nosa veciñanza, colaborando co resto de institucións, e poñendo sempre por diante os intereses dos nosos veciños e veciñas”.
