- Ángeles Vázquez salienta a importancia de concienciar á mocidade no coidado da riqueza ambiental e da biodiversidade da Comunidade
- Os interesados poden enviar as súas propostas para Instagram, TikTok e YouTube ata o vindeiro día 3 de marzo e os tres gañadores recibirán como premio unha excursión guiada para toda a súa clase a un destes espazos protexidos
A conselleira de Medio Ambiente e Cambio Climático, Ángeles Vázquez, animou hoxe ao alumnado de 3º e 4º de Educación Secundaria Obrigatoria (ESO) a participar no concurso #ParqueVibras, que ten como obxectivo promocionar os parques naturais galegos a través de vídeos para redes sociais.
Durante a súa visita ao IES do Sar, en Santiago de Compostela, a conselleira salientou a importancia de concienciar á mocidade no coidado da riqueza ambiental e da biodiversidade da Comunidade. Nesta ocasión, a Xunta puxo en marcha un concurso no que os participantes deberán facer vídeos orixinais para Instagram, TikTok ou YouTube que se centren e inspiren nalgún dos 6 parques naturais de Galicia —Fragas do Eume; Complexo dunar de Corrubedo e lagoas de Carregal e Vixán; Monte Aloia; Baixa Limia-Serra do Xurés; O Invernadeiro; e Enciña da Lastra—.
Logo de explicar que o prazo para poder participar—de forma individual ou en grupo— xa está aberto e permanecerá así ata o próximo 3 de marzo, Ángeles Vázquez indicou que esta iniciativa conta cunha páxina web propia para canalizar toda a información dispoñible e xestionar as inscricións dos participantes, que se poderán facer tamén a través do centro educativo.
A maiores, a conselleira subliñou que, aínda que a temática terá que estar relacionada coa Rede de parques naturais de Galicia, os participantes terán liberdade para xestionar os contidos, que poderán incluír imaxes dalgunha ruta peonil, bailes, gráficos ou memes, entre outros elementos. Ademais, os vídeos deberán incluír no momento da súa publicación en calquera das tres redes sinaladas os seguintes hashtags obrigatorios: #ParqueVibras, #ConcursoNaturezaGalicia e #DescubreParquesGalicia.
O concurso consta de tres categorías: creatividade, viralidade e valor divulgativo. O día 22 de abril daranse a coñecer os 12 finalistas —4 para cada unha delas— e a partir de aí escolleranse os 3 vídeos premiados tendo en conta cal foi a proposta máis orixinal, a que recibiu un maior número de likes e a que contribúe a difundir mellor os valores do noso patrimonio.
Ángeles Vázquez engadiu que o 24 de maio, coincidindo co Día Europeo dos Parques Naturais, se celebrará unha gala de entrega de galardóns e os tres gañadores recibirán como premio unha excursión guiada para todos.
