- Ángeles Vázquez salienta que o Goberno galego aspira a que a Comunidade sexa identificada como un lugar “amable, sostible e saudable” para vivir e desfrutar
- Anima a practicar un turismo respectuoso co medio ambiente e enmarca a creación de ‘Galicia Refuxio Climático’ na estratexia autonómica fronte ao quecemento global, apostando pola mitigación e o impulso da infraestrutura verde en áreas urbanas
- O expositor de Galicia en Fitur alberga unha reprodución a escala dun bosque galego representativo para que os asistentes se poidan somerxer nel con todos os sentidos
A Xunta reivindicou hoxe Galicia como un gran refuxio climático capaz de atraer visitantes durante calquera época do ano grazas á riqueza da súa natureza, paisaxes e biodiversidade, pero tamén a un compromiso medioambiental que a converte nun lugar que ofrece calidade de vida e confort a residentes e turistas.
Durante a presentación oficial da nova marca Galicia Refuxio Climático na Feira Internacional de Turismo (Fitur), un acto ao que asistiu o presidente da Xunta, Alfonso Rueda, a conselleira de Medio Ambiente e Cambio Climático, Ángeles Vázquez, salientou que Galicia representa “calidade de vida” e está conformada por un conxunto de espazos naturais que ofrecen ao visitante “confort, seguridade e descanso”.
Tras lembrar que entre os principais motivos polos que a afluencia turística á Comunidade vai en aumento ano tras ano destacan a súa natureza e riqueza paisaxística, a gastronomía ou o carácter acolledor dos galegos, a responsable autonómica explicou que a Xunta quere que tamén sexa identificada como un lugar “amable, sostible e saudable” que invita a vivir, a desfrutar e “a quedarse” a todas as persoas que a visitan.
“Somos uns privilexiados”, subliñou a conselleira, que insistiu por iso na necesidade de “coidar” entre todos a “materia prima” e o “entorno único” cos que conta Galicia, apostando tamén por un turismo sostible e respectuoso co medio ambiente.
Neste sentido, referiuse ao intenso labor que leva desenvolvendo a Xunta nos últimos anos no marco da súa estratexia fronte ao cambio climático e grazas á cal a Comunidade xa superou os obxectivos de redución de emisións marcados por Europa para o ano 2030. Un traballo no que enmarcou, precisamente, a nova marca Galicia Refuxio Cimático, que “nace con vocación de futuro” e para consolidar esa imaxe dun territorio “verde e azul”, “máxico” e cunha meteoroloxía “benigna e amable” da que desfrutar todo o ano.
A modo de exemplo, Ángeles Vázquez lembrou que nos últimos anos a temperatura media anual en Galicia se incrementou a un ritmo notablemente inferior ao do resto do país, cunha suba de 0,2 graos anuais fronte aos 0,25 graos rexistrados a nivel nacional.
“Estamos orgullosos de que fóra das nosas fronteiras cada vez se coñeza máis a Galicia por ser como somos os galegos pero tamén por como nos abraza a natureza”, concluíu a súa intervención a conselleira, que estivo acompañada polas delegadas territoriais da Xunta na Coruña, Belén Do Campo, en Ferrol, Martina Aneiros, en Lugo, Javier Arias, en Ourense, Manuel Pardo, en Pontevedra, Agustín Reguera, e en Vigo, Ana Ortiz.
Por último e como complemento á presentación da marca, os asistentes puideron achegarse ata o expositor de Galicia onde a paisaxista Cristina García deseñou unha reprodución a pequena escala dun bosque galego con algunhas das principais especies vexetais existentes nas catro provincias. O espazo ofrece a todo aquel que o atravese a oportunidade de somerxerse, a través dunha experiencia multisensorial, nun bosque coas cores, sons e mesmo olores dun ecosistema moi representativo da Comunidade.
Penedos de Pasarela e Traba
Así mesmo, o expositor dedicado a Galicia en Fitur albergou este mediodía a presentación da Paisaxe Protexida Penedos de Pasarela e Traba, un espazo de gran valor natural localizado entre Laxe e Vimianzo, en pleno corazón da Costa da Morte, e o primeiro deste tipo en contar cun plan de xestión propio, aprobado en outubro de 2024.
Durante a súa intervención, a conselleira Ángeles Vázquez considerou que os Penedos son un bo exemplo do tipo de turismo verde, sostible e respectuoso polo que aposta Galicia, citando entre os seus principais atractivos a singularidade e o valor da súa xeomorfoloxía, a riqueza da biodiversidade e unha situación xeográfica privilexiada que, de feito, o converte nun “balcón natural ao Atlántico”.
Un espazo natural único, en definitiva, do que quixo destacar en especial o seu “carácter máxico”, moi representativo dunha Galicia coñecida tamén fóra das súas fronteiras por ser fonte de inspiración de contos, historias e lendas.
Ademais da conselleira, cómpre subliñar que tamén interviñeron no acto de presentación en Fitur o director de Turismo de Galicia, Xosé Merelles, e mais os rexedores dos concellos coruñeses de Vimianzo e Laxe.
