- ― Incídese na importancia de seguir as medidas de protección e de extremar as precaucións, e aconséllase consultar a páxina web do CIAE 112 (www.axega112.gal), que conta con información meteorolóxica e con ligazóns de interese
- ― Co fin de garantir a seguridade dos bens e as persoas, o Goberno galego informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros
- Suspéndese a actividade no exterior nos centros educativos e a actividade deportiva federada e do programa Xogade en 15 concellos da Mariña lucense e en case unha vintena da montaña de Ourense
- A actividade deportiva tamén se cancela no mar nos concellos afectados polo temporal costeiro
A Xunta vén de activar para mañá a alerta laranxa por temporal costeiro no litoral das provincias da Coruña e Pontevedra.
Co fin de garantir a seguridade dos bens e as persoas, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Segundo a Axencia Estatal de Meteoroloxía (Aemet) fenómeno meteorolóxico adverso estará activo desde o mediodía de mañá no noroeste e oeste da Coruña, estendéndose pola tarde ao suroeste da costa coruñesa e ao litoral de Pontevedra por ventos do sur ou suroeste de forza 8 e mar combinada do oeste ou noroeste con ondas de ata seis metros. Na Mariña lucense o nivel e aviso será amarelo por ventos de forza 7.
A maiores, debido a un fenómeno meteorolóxico adverso por vento de nivel laranxa para o venres 24 nas zonas da Mariña de Lugo e a montaña de Ourense, vén de reunirse a Comisión Escolar de Alertas, que acordou suspender mañá as actividades no exterior dos centros educativos radicados nestas zonas. Os concellos afectados poden consultarse no mapa de zonas climáticas de MeteoGalicia. Trátase de 15 concellos na Mariña e 19 na Montaña de Ourense. Do mesmo xeito, a Secretaría Xeral para o Deporte da Consellería de Presidencia, Xustiza e Deportes anunciou a suspensión da actividade deportiva federada e as do programa Xogade que se realicen no exterior nestas zonas, así como o a actividade deportiva federada no mar nos concellos afectados polo temporal costeiro.
A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
Ademais, sinálase a importancia de retirar os obxectos que poidan caer á rúa desde os tellados, balcóns e fiestras, e evitar pasar preto de edificios en ruínas ou en construción, de árbores, de paneis publicitarios e de obxectos susceptibles de desprazarse con vento.
Aconséllase consultar a páxina web do CIAE 112 (www.axega112.gal), que conta con información meteorolóxica e con ligazóns de interese.
