A fronte nacionalista traslada unha moción para demandar que o Concello despregue unha ampla programación este 2025, declarado Ano Castelao, arredor da principal figura política e cultural da historia contemporánea galega
Xabier P. Igrexas: “É fundamental divulgar a súa obra e pensamento, que son un exercicio de autoestima colectiva como pobo e nación, fronte aos intentos de manipulación”
O Bloque Nacionalista Galego traslada unha moción ao Pleno de Vigo para o recoñecemento de Alfonso Daniel Rodríguez Castelao como primeiro presidente de Galiza no seu 75 cabodano. A fronte nacionalista propón que o Concello despregue unha ampla programación este 2025, declarado Ano Castelao, arredor da principal figura política e cultural da historia contemporánea galega, na sesión plenaria convocada para o vindeiro luns.
“O BNG chamamos a poñer en valor a súa traxectoria vital, marcada por un infatigábel compromiso en favor dos dereitos nacionais do pobo galego, por unha inquebrantábel integridade ética na loita contra todo tipo de discriminacións e desigualdades, e a favor da paz desde unha sempre activa solidariedade internacionalista”, destacou o portavoz municipal do BNG de Vigo, Xabier P. Igrexas.
A moción do Bloque propón tres grandes acordos á Corporación municipal. En primeiro lugar, que o Pleno reclame á Xunta o recoñecemento de Castelao como primeiro presidente e do Consello de Galiza como primeiro Goberno galego da etapa contemporánea. En segundo, o apoio do Concello á declaración deste 2025 como Ano Castelao. E tamén que o Goberno local poña en marcha un intenso programa de actividades para divulgar a súa obra e pensamento.
Fronte á manipulación da figura de Castelao
“Cómpre poñer relevo a dimensión política de Castelao, o seu compromiso con Galiza, a súa obra artística e literaria, así como o seu humanismo e internacionalismo solidario”, defendeu o portavoz municipal do BNG, quen considerou “fundamental” reivindicar o Castelao real fronte á “tentación do españolismo e mesmo do autonomismo de manipular e esvaciar a súa figura de toda a súa significación política e social”.
Dende a fronte nacionalista chamaron a ser fieis ao pensamento e compromiso político de Castelao como elementos “indisolúbeis” da súa figura, como símbolo do nacionalismo galego e verdadeiro Pai da Patria Galega. “O mellor antídoto fronte a manipulación de Castelao é, pois, contrapormos de maneira desacomplexada o Castelao que dedicou a súa vida enteira a promover a plena liberación nacional do noso pobo”, salientou Igrexas.
Por estes motivos, o Bloque anima a divulgar de forma masiva a súa obra como “un exercicio de autoestima colectiva como pobo e nación” contra os intentos de negar o seu legado. “A visión manipulada que instalou o franquismo tras a súa morte, desprovista de ideoloxía para utilizalo como estandarte en contra dos ideais que defendeu, constitúe unha fraude histórica que debemos corrixir”, defendeu o voceiro municipal do BNG.
“Todo o que fixo e dixo Castelao ao longo da súa vida, e en todos os lugares do mundo nos que estivo, foi esencialmente política ao servizo da nación e do pobo galego, polo que merece do maior recoñecemento tamén na maior cidade galega como primeiro presidente de Galiza, un demócrata íntegro e exemplar”, remachou Igrexas.
