O Grupo Municipal do BNG alerta sobre a falta de utilidade do aparcadoiro disuasorio de O Campo e critica o custo inxustificado que supón para os recursos municipais, desviando fondos de necesidades máis prioritarias para a veciñanza
O Bloque Nacionalista Galego (BNG) quere trasladar a súa preocupación pola situación do aparcadoiro disuasorio de O Campo, unha infraestrutura que, a pesar de estar operativa desde o verán de 2024, non está a cumprir o seu obxectivo de mellorar a mobilidade en Marín. Lonxe de ser útil, este espazo permanece practicamente sen uso e, ademais, representa unha carga económica para o Concello.
No pleno municipal do 9 de xaneiro de 2025, o Grupo Municipal do BNG destacou que o convenio remitido pola Consellería de Presidencia, Xustiza e Deportes o 24 de outubro de 2024 asigna ao Concello de Marín a titularidade do aparcadoiro. Segundo dito convenio, o Concello debe asumir os custos de explotación, mantemento e conservación sen ningún tipo de achega económica adicional, cunha vixencia inicial ata o 31 de decembro de 2025, prorrogable por catro anos máis.
“É inxustificable que o Concello teña que asumir unha infraestrutura que non cumpre co seu obxectivo inicial e que, en lugar de mellorar a mobilidade, converteuse nunha carga económica para os recursos municipais”, declarou o Grupo Municipal. “A veciñanza non precisa infraestruturas baleiras de uso, senón investimentos que respondan ás súas necesidades reais e que melloren a súa calidade de vida”, engadiron.
A pesar do financiamento inicial a través do Plan de Recuperación, Transformación e Resiliencia da Unión Europea (UE) Next Generation, o aparcadoiro de O Campo non está a cumprir a súa función, o que evidencia unha falta de planificación e unha mala xestión dos recursos públicos.
Dende o BNG consideramos inadmisible que unha infraestrutura destas características supoña custos para o Concello, desviando recursos que poderían destinarse a necesidades máis prioritarias da cidadanía. Marín merece proxectos eficaces, transparentes e ben planificados, e non infraestruturas que se converten en problemas económicos.
