- O Diario Oficial de Galicia publica hoxe e estes apoios destinados ao fomento da prevención de riscos laborais e a actividades neste eido, que este ano se unifican nunha mesma orde para avanzar na simplificación administrativa
- Este programa está dirixido ás organizacións empresariais e sindicais, sectoriais e intersectoriais, fundacións sectoriais e ás asociacións de autónomos e estímase que del se poidan beneficiar unhas 55 entidades
- Algúns exemplos de actuacións financiadas con estes apoios son cursos básicos transversais de prevención de riscos laborais ou outros sectoriais relacionados coa seguridade e saúde en actividades como a hostalaría e a construción, entre outros
- Priorizarase, entre outros, o apoio á formación para a poboación traballadora de máis de 55 anos ou a cualificación en prevención de riscos nas novas formas de organización do traballo e en sectores laborais feminizados
O Diario Oficial de Galicia publica hoxe a convocatoria deste ano das axudas destinadas ao fomento da prevención de riscos laborais e a actividades neste eido cun orzamento de case 2,3 millóns de euros. Como novidade este ano, unifícanse ambas liñas de axudas nunha mesma convocatoria, avanzando así na simplificación administrativa.
O programa de achegas está dirixido ás organizacións empresariais e sindicais galegas, sectoriais e intersectoriais, así como ás fundacións sectoriais paritarias para a promoción da prevención da seguridade e saúde laboral e ás asociacións de autónomos e estímase que se poidan beneficiar desta convocatoria unhas 55 entidades.
Das dúas liñas de axudas que contén a iniciativa, a primeira está destinada a financiar accións de formación e asesoramento en materia de prevención de riscos laborais de carácter intersectorial e sectorial e está dotada con máis de 1,6 M€.
As actividades de carácter intersectorial son as realizadas esencialmente polos gabinetes técnicos de Seguridade e Saúde Laboral das entidades solicitantes e algúns exemplos de actuacións que se teñen apoiado son cursos básicos transversais de prevención de riscos laborais ou de protección da saúde para a mellora das condicións de traballo e adaptacións de postos.
En canto ás accións de carácter sectorial, van en función dos distintos sectores solicitantes e con estes apoios téñense financiado cursos como os de prevención de riscos ergonómicos para cociñeiros no ámbito da hostalaría e no da construción a formación de coordinador/a en materia de seguridade e saúde nas obras. Outro exemplo de cursos que se apoian é o de operador ou de manexo seguro de carretillas elevadoras ou de plataformas elevadoras.
A segunda liña de achegas promoverá actividades preventivas tamén de carácter intersectorial ou sectorial, entre elas xornadas técnicas de prevención de riscos laborais, seminarios, estudos e traballos técnicos e publicacións e conta con máis de 655.100 euros.
Detalles da convocatoria
A Xunta outorgará na resolución da convocatoria unha maior puntuación ás entidades atendendo a criterios de paridade nos seus cadros de persoal ou de estabilidade no emprego. Priorizarase a formación en poboación traballadora de máis de 55 anos ou a cualificación en prevención de riscos nas novas formas de organización do traballo e en sectores laborais feminizados.
Estas achegas poden solicitarse desde mañá ata o 27 de febreiro e as entidades interesadas poden consultar os requisitos específicos para poder acceder a estes apoios na orde que publica hoxe o DOG.
Ligazón á convocatoria no DOG:
https://www.xunta.gal/dog/Publicados/2025/20250127/AnuncioG0767-301224-0009_gl.html
