O presidente da Deputación mantén un encontro cos organizadores da primeira edición desta competición, que consolida á provincia como un destino turístico descentralizado e ligado ao deporte
O presidente da Deputación de Pontevedra, Luis López, eloxia o salto de calidade experimentado pola Volta Galicia BTT ao converterse na primeira proba desta modalidade de ciclismo con categoría UCI que se celebra en Galicia e supón unha nova mostra do potencial da provincia para acoller eventos deportivos de impacto internacional. Nun encontro con directivos dos clubs organizadores do evento, Alberto Penas, do Club Ciclista Montes do Deza; e Javier Busto, do Extol MTB Team, o mandatario provincial salientou a importancia de acoller un evento que contribúe a seguir descentralizando a actividade deportiva nun territorio que segue a consolidarse como a “provincia do deporte”.
A Volta Galicia BTT celebrarase por primeira vez este ano entre os días 1 e 4 de maio. Trátase dunha competición por etapas que toma a remuda da clásica Lalín Bike Race para converterse na primeira carreira por etapas en BTT con categoría UCI que se celebra en Galicia. A competición constará de catro etapas: a primeira terá lugar no Carballiño, a segunda e a cuarta, en Lalín; e a terceira en Melide. Ademais, trátase dunha proba aberta a todo tipo de afeccionados á bicicleta de montaña, pois ademais das categorías elite e sub 23 masculina e feminina, tamén haberá clasificacións para os maiores de 30, 40, 50 ou 60 anos, así como unha modalidade de parellas masculinas, femininas ou mixtas. Do mesmo xeito, cada participante pode elixir participar nas catro etapas ou en etapas soltas, agás na segunda etapa, aa contrarreloxo de Lalín do 2 de maio, na que só poderán os que compitan nas catro etapas.
A celebración desta carreira ciclista afonda na estratexia do goberno provincial de promover a organización de eventos deportivos de interese xeral ao longo de todo o ano e en distintos concellos da provincia. O obxectivo é descentralizar os grandes acontecementos das grandes cidades para repartir a riqueza que xera este tipo de eventos e promocionar todas as comarcas, tamén as do interior como a do Deza, como unha parte do destino turístico Rías Baixas.
Na recentemente celebrada Feira Internacional do Turismo de Madrid, Fitur, a Deputación centrou a súa campaña na presentación dun destino composto por 61 concellos no que o interior da provincia é tan atractivo e interesante coma os da costa. Acoller eventos deportivos como esta Volta Galicia BTT no Deza, o paso do Gran Camiño, cunha etapa que partirá de Marín e rematará na Estrada; ou volver ser escenario do de La Vuelta a España este verán pola provincia, cunha etapa entre Poio e Mos, dan boa mostra da aposta que a Deputación está a facer por consolidar as Rías Baixas como un destino turístico ligado ao deporte e tamén do atractiva que resulta a provincia de Pontevedra para a organización de competicións ciclistas de categoría internacional.
