Os técnicos do SEVIC visitarán uns 80 establecementos comerciais da localidade co obxectivo de que sexan parte activa na xestión responsable dos biorresiduos
A Deputación de Pontevedra inicia este mércores 29 de xaneiro as visitas que o servizo de vixilancia, inspección e control de xestión de residuos (SEVIC) realizará a establecementos comerciais de Tomiño, un dos 16 concellos da provincia adheridos a esta iniciativa, que ten por obxectivo axudar os gobernos municipais da provincia a cumprir as esixencias da Lei 7/2022, de 8 de abril, de residuos e solos contaminados para unha economía circular (LRSCEC).
O obxectivo destas visitas, que se realizarán ao longo de tres semanas a uns 80 establecementos produtores de biorresiduos de Tomiño, é que sexan parte activa na xestión responsable destes residuos, contribuíndo así á preservación do medio ambiente e ao fomento de espazos más limpos e saudables para os seus habitantes. Neste eido, o persoal técnico da Deputación daralles resposta ás súas dúbidas e orientaraos sobre as mellores prácticas de separación e manexo axeitado dos residuos. Ademais, tamén se recadará información para avaliar o cumprimento da normativa aplicable, concretamente sobre a correcta separación dos residuos nas diferentes fraccións coa que garantir a súa recollida separada. Adicionalmente, nestas visitas entregaranse guías e ofrecerase tamén contacto telefónico para resolver dúbidas.
Nestes momentos son 16 os concellos da provincia adheridos ao SEVIC: Baiona, Barro, Bueu, Cangas do Morrazo, A Cañiza, Gondomar, A Guarda, Meis, Moaña, Mondariz-Balneario, As Neves, O Porriño, O Rosal, Salceda de Caselas, Silleda e Tomiño. Ao abeiro deste servizo, os produtores de residuos estarán suxeitos a inspeccións periódicas que serán levadas a cabo polo corpo de funcionarios habilitado pola Deputación, que teñen a consideración de axentes da autoridade. Deste xeito, os feitos constatados por este persoal formalízanse nunha acta e gozan da presunción de certeza a efectos probatorios. Polo de agora xa se realizaron visitas aos concellos de Baiona, Barro, Bueu, Cangas do Morrazo, Meis, Moaña, Salceda de Caselas e Silleda.
