O presidente da Deputación de Ourense participou nunha visita ás instalacións da EDAR de A Rúa, onde se lidera o proxecto Ruagua para impulsar a economía circular
A Deputación participa neste programa a través do Consorcio de Augas de Valdeorras, AquaOurense e Cetaqua
O proxecto Ruagua, unha ferramenta de impulso á economía circular nos servizos integrais da auga e no que participa a Deputación de Ourense a través do Consorcio de Augas de Valdeorras, AquaOurense e Cetaqua, avanza nos seus obxectivos co remate de varias instalacións de enerxía renovable en Valdeorras. O presidente provincial, Luis Menor, visitou as instalacións da Estación depuradora de augas residuais (EDAR) de A Rúa, onde coñeceu da man dos técnicos os últimos avances logrados nesta infraestrutura.
A EDAR de A Rúa logra dar un salto de calidade ao transformarse nunha estación rexeneradora de auga, avanzando igualmente nos requerimentos normativos en materia de reutilización de augas depuradas. Neste sentido, Luis Menor puxo en valor durante a visita á EDAR de A Rúa como “modelo” e “exemplo” a seguir noutros concellos por establecer unha solución “innovadora, sostible e moderna” fronte ao reto de aproveitar a auga depurada para outros usos e contribuír á loita contra a contaminación e o cambio climático. “Valdeorras está a cabeza con este proxecto que nos gustaría ter en toda a provincia, é exportable”, dixo Luis Menor.
O presidente provincial tamén puxo en valor o resto de iniciativas relacionadas cunha mellora na eficiencia do ciclo da auga e que se lideran dende Valdeorras. “É o único sitio onde hai un Consorcio de Augas”, sinalou Menor, destacando que esta organización permite “dar resposta á comarca, dar resposta ás necesidades da veciñanza”.
Do mesmo xeito, Luis Menor interesouse polos avances do Perte da Auga en Valdeorras, unha iniciativa novidosa, financiada con fondos Next Generation, na que a Deputación decidiu apostar primeiramente polo oriente ourensán para iniciar a instalación de contadores intelixentes. O presidente provincial avanzou que xa se cumpriu coa instalación da metade dos servizos previstos, que chegarán a ser 9.000 en toda a comarca de Valdeorras.
“É un motivo de orgullo que Valdeorras estea á cabeza na xestión e no tratamento da auga, con solucións positivas económicamente e para o medio ambiente”, valorou Menor.
Balance do proxecto
Por outra banda, os técnicos de Ruagua explicaron os avances do programa, que busca garantir a dispoñibilidade de auga durante as épocas de seca e reducir o estrés hídrico na contorna de A Rúa.
Neste sentido, xa está rematada a instalación de placas solares e a instalación do sistema terciario de auga residual, así como o dispensador de auga.
Ademais, no marco do programa Ruagua, puxéronse en marcha numerosas actividades de cocreación coa cidadanía, para coñecer as súas necesidades e explicar os beneficios da iniciativa. Do mesmo xeito, Ruagua achegouse aos centros educativos, a través do impulso de hortas ecolóxicas nas escolas.
Entre os beneficios do programa encóntranse aspectos clave para a Deputación de Ourense como son a xestión da auga, enerxía renovable, agricultura sostible, a prevención de incendios e a mellora da calidade de vida dos cidadáns.
Tres eixos
Ruagua conta cun enfoque circular baseado en tres eixos: xeración de auga rexenerada, uso de enerxía solar como fonte renovable e produción de compost a partir das augas residuais xeradas no contorno da EDAR. Máis aló da innovación tecnolóxica, é un proxecto fundamentalmente demostrativo da necesidade de fomentar un uso racional da auga, así como aumentar a resiliencia ante o cambio climático, poñendo en valor a posibilidade de aproveitar as augas residuais para a súa reutilización, coas debidas garantías sanitarias, para determinados usos.
O proxecto “Ruagua” foi un dos tres proxectos gañadores, dos 162 presentados de toda España, que obtivo unha dotación de 300.000 euros do Proxecto DEMOS de economía circular en comunidades rurais de menos de 5.000 habitantes.
Desenvolvemento sostible
O Proxecto DEMOS forma parte do Plan Allen da compañía IKEA -membro conselleiro de Cotec. O Plan Allen é unha iniciativa de IKEA para contribuír á recuperación da economía e a sociedade española. O seu principal obxectivo é crear emprego e promover a xeración dun desenvolvemento sostible. Ademais de Cotec, forman parte outras tres entidades como WWF, FADEMUR/FADEMUR e ASHOKA.
