As estancias programadas este 31 de xaneiro e 1 de febreiro levarán a familias de 14 concellos ao Gran Talaso Hotel Sanxenxo, o Hotel Bienestar Moaña, o Hotel Coia de Vigo, o Hotel Alda do Carril (Vilagarcía) e o Hotel Restaurante Pontiñas de Lalín
A Deputación de Pontevedra programa esta fin de semana novas saídas do programa Lecer en familia, que levarán a preto de 100 persoas de 14 concellos da provincia a cinco dos 12 establecementos hoteleiros participantes no programa. O obxectivo desta iniciativa é reforzar os lazos familiares nun ambiente de convivencia financiando estancias de fin de semana en establecementos hoteleiros, das que poden gozar familias con menores ao seu cargo e que residan na provincia de Pontevedra.
Deste xeito, 62 persoas dos concellos de Cangas do Morrazo, Lalín, Marín, Pontevedra, Redondela, Salceda de Caselas, Vigo e Vilagarcía de Arousa gozarán dunha estancia no Gran Talaso Hotel Sanxenxo. 16 persoas de Ponte Caldelas, Pontevedra e Vigo pasarán a fin de semana no Hotel Bienestar Moaña, mentres que 12 persoas de Moaña, Poio, Ponteareas e Vigo o farán no Hotel Alda do Carril (Vilagarcía de Arousa). Tamén participarán 4 persoas de Pontevedra cunha estancia no Hotel Restaurante Pontiñas de Lalín, así como outras 4 persoas de Silleda pasarán a fin de semana no Hotel Coia de Vigo.
En total, van participar en Lecer en Familia preto de 3.000 persoas de 52 concellos da provincia, que asistirán a 12 estabelecementos entre os que se inclúen spas, balneario, talasos e hoteis tanto de zonas rurais como urbanas. En réxime de media pensión, tamén realizarán actividades socioculturais (cunha ampla variedade a escoller asociada a cada estabelecemento) ou accederán aos circuítos termais dos que dispoñan nas súas instalacións. Ademais de potenciar a calidade de vida das familias, o programa tamén busca impulsar o sector turístico da provincia de Pontevedra.
Das preto de 3.000 prazas, 50 correspóndense cun réxime especial e son subvencionadas ao 100%. As de réxime xeral están subvencionadas con 60 € para maiores de 12 anos, 30 € para nenos de 3 a 12 anos, e ao 100% para menores de 3 anos. As estadías realizaranse en temporada baixa (entre xaneiro e marzo), con estancias dunha noite en fins de semana, períodos non lectivos ou vésperas de festivo.
