Xoán Reices: “O goberno municipal conta co goberno da Xunta e coa Deputación de Pontevedra para botar unha man no tema económico; se queren poden facelo!”
Segundo informacións publicadas nun medio de comunicación local o alcalde da Estrada, Gonzalo Louzao “ofreceu” todo o apoio do goberno municipal para “axilizar” a tramitación urbanística dunha segunda residencia para persoas maiores na Estrada.
Para o concelleiro do BNG, Xoán Reices, “o que debería facer o alcalde é traballar sen descanso para que a Estrada teña unha nova residencia, pero pública, para prestar un servizo de calidade e asequíbel as persoas maiores que o soliciten”.
“O que non é de recibo”, explica Reices, “é a teima do PP de dar todo tipo de facilidades ás empresas que fan negocio cos coidados das persoas maiores e dependentes, cando, como xestores públicos, a súa preocupación debería ser a de promover servizos públicos para todos os veciños e veciñas”.
O concelleiro do BNG engade “o goberno municipal ten todo na súa man para facer unha residencia pública na Estrada, contan co goberno da Xunta e coa Deputación de Pontevedra para botar unha man no tema económico, non poden dicir que non hai cartos, xa que para outras cousas máis prescindíbeis si os hai”. “Por iso”, indica, “instamos ao alcalde a traballar para que a Estrada teña unha residencia pública de maiores, no canto de estender a alfombra vermella ás empresas privadas que fan negocios cos nosos maiores”.
