O secretario xeral de Emprego e Relacións Laborais, Pablo Fernández, mantivo unha reunión de traballo coa directora xeral de Xuventude, Lara Meneses, e coa directora xeral de Promoción da Igualdade, María Quintiana, co gallo de seguir avanzando no deseño e elaboración da Estratexia Mocidade Activa, unha planificación que se está a deseñar no marco do traballo transversal das diferentes consellerías da Xunta con competencias neste eido.
O obxectivo desta estratexia é mellorar a situación vital das persoas mozas galegas, así como a súa empregabilidade a través de programas de fomento da contratación. Soamente por parte da Consellería de Emprego, Comercio e Emigración, a medida contará en 2025 cun orzamento de 20M€, e baixo ela englóbanse todas aquelas achegas encamiñadas ao impulso do emprego xuvenil, entre as que se sitúan, entre outras, o Galicia Emprega Mozos, cun orzamento de arredor de 3,5M€—englobada na convocatoria de Galicia Emprega, dotada en total con 20M€—, ou o Programa Investigo (4,8M€), que fomenta a contratación de investigadores e tecnólogos menores de 30 anos, persoal técnico e outros profesionais en I+D+i.
