O presidente provincial, acompañado polo alcalde e deputado Roberto Carrero, visita as obras de reforma integral que se están a executar no Bloque I do Edificio Sinde ao abeiro do programa provincial PON2030
“Esta visita é unha mostra do que facemos na Deputación, que é cumprir coa palabra. Cumprimos cando se executa unha obra que asinamos, cando colaboramos co Concello e cando atendemos as necesidades da veciñanza”, sostén López
O presidente da Deputación de Pontevedra, Luis López, visitou este mércores as obras de rehabilitación reforma integral do Bloque I dos Edificios Sinde de A Guarda para adecualos para uso social. Unha intervención integral que é froito da colaboración entre as administracións provincial e municipal a través do programa PON2030 que supón o investimento de máis de un millón de euros, financiados integramente pola Deputación. Acompañado polo alcalde e deputado responsable de Cooperación Transfronteiriza, Roberto Carrero; o mandatario provincial percorreu o inmoble que, ao remate das obras, seguirá funcionando como punto de encontro para distintas asociacións locais pero con mellores equipamentos e maior comodidade. “Non hai moito tempo estabamos asinando o alcalde e máis eu o convenio de saída para poder executar este proxecto. Hoxe estamos nesta visita que é unha mostra do que facemos na Deputación, que é cumprir coa palabra. Cumprimos cando se executa unha obra que asinamos, cando colaboramos co Concello da Guarda para executar un proxecto destas características e cando poñemos a disposición da veciñanza instalacións e servizos para atender as súas necesidades”, afirmou o titular do goberno da Deputación.
A obra inclúe a redistribución dos espazos interiores de maneira que se reducen as grandes salas por novos espazos adecuados para acoller a actividade de novos colectivos. Aínda así, seguirán existindo salas diáfanas e multiusos de uso compartido, así como unha mellora completa das instalacións sanitarias. Por outro lado, no exterior do edificio estase a proceder á renovación das carpinterías e o cambio da cuberta para mellorar a eficiencia enerxética do edificio. A través dun convenio de colaboración enmarcado no programa provincial PON2030, a Deputación asumiu a financiación do 70 % do orzamento, uns 710.000 euros, mentres que o 30 % restante (328.000€), correspondente inicialmente ao Concello, achégao tamén o ente provincial a través do Plan +Provincia. “Poñemos á disposición da veciñanza un edificio renovado, máis accesible, máis sustentable e máis confortable”, subliñou o presidente López.
Na tramitación desta reforma integral tivo un papel fundamental o alcalde Roberto Carrero. “Para chegar a este punto hai un artífice”, recoñeceu o presidente o labor do rexedor, ao que felicitou “ polo traballo que está a realizar na Guarda”, así como no conxunta da provincia á fronte da área de Cooperación Transfronteiriza “á que lle está a dar un vuelco no impulso a proxectos útiles para este e o outro lado da raia”. Pola súa banda, o alcalde Roberto Carrero agradeceu a implicación da Deputación para facer realidade un proxecto que fará da Guarda “un referente na comarca do Baixo Miño”.
Unha colaboración entre a Deputación e o Concello da Guarda que está garantida para este ano 2025, no que o Concello poderá recibir ata un total de 1,6 millóns de euros a través de programas de Cooperación como o +Provincia, do que lle corresponden 746.000 euros; da segunda edición do Plan Extraordinario de Infraestruturas Deportivas, polo que recibirá 138.000 euros; ou do Plan Extra, polo que poderá percibir ata un máximo de 700.000 euros.
