“Lores fixo un mal negocio, unha pésima xestión cuxa consecuencia está a ser o traslado a Santiago do retablo do convento de Santa Clara, que levaba séculos na nosa cidade”, lamentou o vicepresidente provincial
A Deputación de Pontevedra avanza “polo bo camiño” para manter o patrimonio histórico, artístico e cultural de Santa Clara na capital da provincia. Así o asegurou o vicepresidente provincial Rafa Domínguez no día no que comeza o traslado do retablo do convento a Santiago. “Lores fixo un mal negocio, unha pésima xestión, cuxa consecuencia está a ser o traslado a Santiago do retablo de Santa Clara, que levaba séculos na nosa cidade”, lamentou o vicepresidente.
“Non podemos esquecer que se trata dunha obra histórica, dun elemento que está na memoria de todos os pontevedreses, dun espazo ante o que tanta xente da nosa cidade rezou, que levaba séculos en Pontevedra. É unha mágoa que este retablo tan ligado a esta cidade, con tanta historia, teña que marchar a Santiago por unha mala xestión de Lores”, afirmou Domínguez.
Fronte a este feito, o vicepresidente remarcou que a vontade da Deputación é “intentar poder manter o resto do patrimonio de Santa Clara en Pontevedra, para o desfrute de todos os pontevedreses”. Neste eido insistiu que as xestións coas clarisas están “moi avanzadas” e “van polo bo camiño, agardando a que se asine o acordo para que poida ser unha realidade”.
