Veciños e veciñas de nove concellos da provincia gozarán de estancias no Hotel Carlos I Silgar, situado en Sanxenxo
25 persoas de nove concellos da provincia desfrutarán a próxima semana do programa de termalismo da Deputación de Pontevedra +Benestar con estadías no Hotel Carlos I Silgar, situado no concello de Sanxenxo. En concreto, trátase de persoas dos concellos de Baiona, Cangas do Morrazo, Moaña, Pontevedra, Poio, O Porriño, Salvaterra de Miño, Vigo e Vilaboa, que poderán gozar destas estancias a partir deste domingo 16 de febreiro.
No marco do programa de termalismo +Benestar, preto de 2.200 persoas de máis de 55 anos de 60 concellos da provincia pasarán seis días e cinco noites en balnearios, talasos ou spas de Sanxenxo, Mondariz, O Grove e Lalín. A Deputación de Pontevedra pretende con esta iniciativa facilitar aos veciños da provincia o acceso a actividades de ocio saudable e envellecemento activo en establecementos hostaleiros e, ao mesmo tempo, dinamizar a economía da provincia, impulsando a creación e o mantemento de postos de traballo no sector turístico durante os períodos de menor actividade.
O organismo provincial subvenciona 2.097 das prazas de réxime xeral con 100 €, e outras 30 de réxime especial están subvencionadas con 400 €, mentres que os usuarios deben facerse cargo da cantidade restante. Ademais da estadía, o paquete comprende a pensión completa, o uso do spa, do balneario ou doutras instalacións de características similares un mínimo de dúas horas ao día, e o traslado de ida e volta en autobús aos establecementos desde os concellos de Vigo ou Pontevedra.
