“O ciclismo é o estandarte da provincia do deporte e o complemento perfecto para o modelo de turismo das Rías Baixas”, afirma López na posta de largo do Froiz en Poio, na que se presentou o perfil da etapa que unirá o 9 de setembro Combarro e Mos
O presidente da Deputación de Pontevedra, Luis López, salienta a estreita relación entre o ciclismo e a provincia, que volverá ser este ano escenario de grandes carreiras de impacto internacional como La Vuelta a España ou O Gran Camiño, que consolidan á de Pontevedra como “a provincia do do deporte, especialmente a do ciclismo”. Fíxoo diante do mosteiro de Poio, onde tivo lugar a presentación do Grupo Deportivo Supermercados Froiz para a presente tempada e na que participaron, ademais do mandatario provincial, grandes figuras do ciclismo nacional, os dirixentes e ciclistas do equipo local, o alcalde Ángel Moldes e o secretario xeral para o Deporte, Jose Ramón Lete Lasa.
“Se Pontevedra é a provincia do ciclismo, non o é so pola tradición de equipos como o Supermercados Froiz, tampouco polo amplo número de ciclistas que percorren as nosas vías, nin polo éxito de organización e participación das carreiras que organizan os nosos clubs, asociacións ou federación. O ciclismo é o estandarte da provincia do deporte e o complemento perfecto para o modelo de turismo que ofrece as Rías Baixas”, remarcou o presidente Luis López durante a súa intervención.
Conducido polo xornalista Terio Carrera, o acto comezou coa proxección dun vídeo sobre a tempada 2024 cunha referencia especial á vitoria de Miguel Rodríguez no campionato de España sub 23. Despois de presentar o plantel do equipo de ciclocrós, o presentador conversou cos ciclistas Aroa Otero e Miguel Rodríguez. Logo tomou a palabra o secretario xeral para o Deporte, Jose Ramón Lete Lasa; para continuar cun vídeo dun adestramento do equipo ciclista e, a continuación, a presentación dos corredores do plantel do GD Supermercados Froiz, que rematou cunha conversa entre o ciclista Guillermo García janeiro e o director deportivo Evartisto Portela, ao que o presidente Luis López lle dedicou palabras de agarimo e admiración.
A segunda parte do acto centrouse nun dos grandes acontecementos deportivos que vivirá a provincia este ano e no que Poio será protagonista. Despois de proxectar un vídeo con imaxes de Combarro, presentouse o perfil da décimo sexta etapa de La Vuelta a España, que unirá o vindeiro 9 de setembro Combarro (Poio) e o Alto de Herville (Mos), cunha conversa entre os exciclistas Óscar Pereiro e Pedro Delgado e o director xeral de La Vuelta, Javier Guillén. O acto rematou cunha entrega de agasallos, unha foto de familia e os discursos do presidente provincial e o alcalde de Poio.
“Por segundo ano consecutivo, a provincia de Pontevedra volverá formar parte do percorrido de dúas das máis grandes carreiras ciclistas do calendario internacional. A primeira, a vindeira semana, coa segunda etapa do Gran Camiño entre Marín e A Estrada; e a segunda terá lugar no verán, cun novo paso de La Vuelta a España na que Poio será o gran protagonista ao ser punto de partida da etapa 16”, salientou Luis López, quen lembrou a figura de Magín Froiz para desexar sorte ao equipo pontevedrés. “Esta provincia sempre vai estar orgullosa dun equipo que sempre o dá todo”, concluíu Luis López.
Ao remate do acto e convidado polo alcalde Ángel Moldes, o presidente Luis López, xunto co director xeral de La Vuelta, Javier Guillén; e os exciclistas Pedro Delgado, Álvaro Pino e Óscar Pereiro, asinou no libro de honra do Concello de Poio.
