A convocatoria Demo Day está dirixida aos dez centros educativos de Gondomar, Lalín, Pontevedra e Vigo que participan este curso no proxecto DepoEmprende na FP, e repartiranse un total de 1.900 euros
A Deputación de Pontevedra pecha o próximo mércores 12 de marzo o prazo para que os dez centros educativos adheridos ao programa DepoEmprende na FP este curso escolar (situados nos concellos de Gondomar, Lalín, Pontevedra e Vigo) participen nos Premios Demo Day, dotados de 1.900 euros. Con estes galardóns, a institución provincial pretende promover entre o alumnado de Formación Profesional de grao medio e superior a iniciativa emprendedora, tanto no ámbito empresarial como no autoemprego.
Os dez centros educativos da provincia que participan no proxecto DepoEmprende na FP neste curso son o IES Plurilingüe Terra de Turonio (Gondomar), o IES Laxeiro (Lalín), o CIFP A Xunqueira (Pontevedra), o CIFP Carlos Oroza (Pontevedra), o CIFP Montecelo (Pontevedra), o IES Sánchez Cantón (Pontevedra), e os vigueses CIFP Manuel Antonio, Colexio Vivas, IES A Guía e IES Politécnico de Vigo. Poderán presentar un máximo de dous proxectos entre os desenvoltos no marco de DepoEmprende na FP.
Os 1.900 euros repartiranse en dúas categorías: 1.200 para o alumnado de grao superior, con dous premios de 700 e 500 euros, e 700 para o de grao medio. No caso de que non se acade o número mínimo de proxectos de grao medio (establecido en tres), establecerase una única categoría con tres premios: un primeiro dotado con 900 euros, un segundo con 600 e un terceiro con 400 euros.
A finalidade desta convocatoria é promover entre o alumnado a iniciativa emprendedora así como a actitude necesaria para asumir riscos e responsabilidades. A metodoloxía proposta baséase en que os mozos e as mozas participantes elaboren un proxecto empresarial relacionado coa familia profesional do ciclo formativo que cursen. Os proxectos seleccionados entrarán nun programa intensivo de apoio e asesoramento denominado “Aceleración de proxectos” e o proceso rematará este mes de marzo co acto de entrega dos Premios Demo Day, no que se realizará a presentación e valoración dos proxectos co fin de determinar os premiados.
DepoEmprende na FP é unha das tres modalidades nas que se divide este programa para centros educativos da provincia, xunto a DepoEmprende na Escola e DepoEmprende na ESO. A Deputación busca promover a cultura emprendedora no marco do sistema educativo e impulsar que o alumnado sexa protagonista da súa propia aprendizaxe cun traballo desde a práctica. A metodoloxía proposta baséase na elaboración e xestión de proxectos empresariais para que o alumnado asuma o risco de afrontar diferentes situacións laborais e, deste xeito, mellore a súa participación activa na vida económica, social e cultural da súa contorna.
