• O proxecto xa recibiu o visto bo da Consellería de Industria e está pendente de contar coa autorización de Augas de Galicia, tal e como sinala o alcalde, Jacobo Pérez, que salienta que a actuación será financiada a través do Remanente de Tesourería de 2024
• O rexedor caldense informa estes días porta por porta aos veciños e veciñas da contorna da Igrexa de Saiar do inminente inicio das obras de mellora de saneamento na zona
O Concello de Caldas de Reis continúa completando a súa folla de ruta no que á dotación, mellora e ampliación de servizos básicos no rural se refire, no que é un dos grandes obxectivos marcados neste mandato. O alcalde, Jacobo Pérez,
confirmou hoxe que o Goberno local ten previsto a construción dunha nova depuradora de tratamento de augas residuais na parroquia de Santa Mariña de Carracedo. Trátase dunha infraestrutra que dará servizo aproximadamente a medio milleiro de veciños e veciñas da localidade. Tal e como confirmou Pérez Gulín, o proxecto conta co visto bo da Consellería de Economía e Industria. “Agora, estamos á espera da autorización por parte de Augas de Galicia para continuar con toda a tramitación”, sinalou o rexedor caldense. A construción da nova depuradora contará cun orzamento que ascende a uns 270.000 euros aproximadamente e será financiada con fondos propios. En concreto, realizarase con cargo ao Remanente de Tesourería correspondente ao exercicio de 2024. Jacobo Pérez explicou que o feito de poder asumir unha obra desta importancia con recursos propios “deixa ás claras a boa xestión que se está a realizar en materia económica, algo que nos permite dar prioridade a actuacións tan importantes coma esta, que garantirá un servizo básica para un gran número de veciños e veciñas de Carracedo”.
Por outra banda, está previsto que nas vindeiras datas comecen as obras para a implantación dunha nova rede de saneamento de augas residuais no núcleo da Igrexa, en Saiar. Precisamente, o alcalde, acompañado polo edil da parroquia, Juan Carlos Ortigueira, estivo hoxe na zona na que se acometerán os traballos, que serán executados pola empresa Pérez Portela Sociedad Limitada. A adxudicataria xa presentou toda a documentación necesaria, incluído o pertinente plan de seguridade, polo as tarefas iniciaranse de xeito inminente. Jacobo Pérez explicou que ao longo dos últimos días estanse a repartir cartas informativas entre os residentes aos que afectarán as obras, nas que que se lles explican os detalles dunha actuación que contará cun orzamento de 199.310,28 euros (IVE engadido) e que contan cun prazo de execución de tres meses. O proxecto finánciase con cargo ao Plan +Provincia da Deputación de Pontevedra, correspondente á convocatoria de 2024. “Agradecemos a comprensión e colaboración da veciñanza polas posibles molestias que poidan ocasionar as obras e animamos a calquera persoa que precise de máis información a que se poña en contacto co Concello, onde será atendido na Alcaldía”, sinalou o rexedor, que indicou que a realización dos traballos pode conlevar cortes de tráfico, ademais doutras restricións puntuais. Hai que lembrar que o proxecto contempla a instalación de varios colectores soterrados, coas súas correspondentes acometidas domiciliarias. A maiores, procederase á dotación dunha estación de bombeo, coa súa correspondente impulsión. Esta é unha das actuacións que tiñamos pendentes de comezar por mor dos tempos administrativos”, lembrou Pérez Gulín. Por último, o alcalde informou tamén de que os técnicos municipais están a redactar un proxecto para ampliar a dotación de saneamento en San Clemente, concretamente no tramo entre Faramontáns e Baltar. “Seguimos apostando por actuacións que supoñen unha mellora importante para a calidade de vida da veciñanza, neste caso no noso rural”, finalizou.
