A obra inclúe sinalización horizontal e vertical así como de redutores de velocidade
O Concello de Vilaboa procederá ao asfaltado de varios camiños en Figueirido con cargo ao Plan Máis Provincia co obxectivo de mellorar a seguridade viaria polo que, na medida do posible, ampliarase a sección da calzada gañando a superficie dalgúns sobreanchos e renovarase a capa de pavimento con extensión dunha nova de aglomerado en quente de 5 centímetros de espesor. A actuación inclúe a sinalización horizontal e vertical executando ademais redutores de velocidade tipo “lomo de asno”.
Os traballos comezarán coa demolición dos pavimentos actuais e a limpeza mecánica e manual das cunetas, o fresado en acceso a vivendas e conexión con outros tramos, a renovación da capa de rodadura e o realce das tapas de rexistro en calzada mediante dado de formigón.
A actuación inclúe a mellora da conexión de camiños municipais coa estrada provincial EP-0103 en tres puntos concretos nos que se realizará a renovación da capa de rodadura con aglomerado en quente, instalarase sinalización vertical e executarase o pintado da sinalización horizontal . En canto a drenaxe das augas pluviais garantirase unha correcta canalización para evitar escorrentías á estada.
