Os nacionalistas denuncian a política de cemento e formigón do alcalde, Telmo Martín, de quen recordan que levou a cabo as obras sen ter en conta á veciñanza, o que provocou un forte malestar en Portonovo
Ademais das prantacións caídas e do deterioro, o Bloque advirte de que este proxecto millonario conlevou a supresión de máis de 30 prazas de estacionamento, agravando o déficit de espazos para aparcar que xa existe na vila mariñeira
O grupo municipal do Bloque Nacionalista Galego (BNG) de Sanxenxo denuncia as primeiras deficiencias que xa se puideron localizar na obra realizada polo Concello na contorna de Caneliñas, en Portonovo, onde se empraza o coñecido como Miradoiro da Peixeira. Apenas unha semana despois da súa apertura oficial, nos últimos días xa son visibles diferentes desperfectos e prantacións caídas. Os nacionalistas instan ao alcalde, Telmo Martín, a que aclare se esta circunstancia se vai a repetir cada vez que as condicións meteorolóxicas non acompañen. “Non estamos a falar do paso dun temporal especialmente virulento, senón duns días de choiva e algo de vento”, recalcan desde o Bloque, ao tempo que recordan que o proxecto contou cun orzamento próximo ao millón de euros.
Para o grupo da oposición, a obra levada a cabo neste emprazamento é unha proba máis da nefasta xestión que o señor Telmo Martín está a protagonizar neste mandato, marcado pola súa política de cemento e formigón. “Os traballos foron levados a cabo de forma chapuceira e sen ter en conta á veciñanza”, denuncia o BNG, que recorda que o pasado mes de febreiro veciños e veciñas de Portonovo convocaron unha asemblea para abordar o estado dunhas obras que tamén estiveron marcadas polo polémico cambio de concesionaria que se produxo en plena execución dos traballos. O voceiro nacionalista, Fran Leiro, ten claro que a ausencia de dirixentes do Goberno local a esa reunión “foi unha proba máis que patente do nulo interese por parte do señor Martín e do equipo de Goberno do Partido Popular polas inquedanzas e preocupacións da veciñanza ao respecto desta obra, o que sen dúbida é un novo exemplo da actitude autocrática e da falta de transparencia coa que actúa Telmo Martín”.
O Bloque lamenta que o alcalde continúe na súa teima de investir orzamentos millonarios para “aplicar máis formigón e cemento” en obras que non son de primeira necesidade, ao tempo que continúa deixando de lado ás parroquias do rural e amosando “unha preocupante incapacidade” para garantir o bo funcionamento de servizos básicos en moitas zonas do municipio. No caso da obra de Caneliñas, os nacionalistas tamén recordan que a presión veciñal resultou decisiva para que se modificase o proxecto orixinal, impedindo que se cambiase de emprazamento a escultura da Peixeira, obra de Alfonso Vilar. “Quizais por iso o traslado da estatua do Aviador Piñeiro ao Paseo de Silgar se fixo desde o máis absoluto silencio, non fose a ser que o señor alcalde volvese a ter problemas coa veciñanza”, ironiza Leiro.
Ademais dos desperfectos e do estado que xa presenta a zona poucos días despois a súa apertura, o BNG tamén recorda que a insistencia de Telmo Martín en executar este proxecto supuxo a supresión de máis de 30 prazas de estacionamento na contorna. Un feito que non fai máis que agravar o déficit de espazos para aparcar que existe en Portonovo e que se acentúa especialmente durante o verán.
