• O alcalde, Jacobo Pérez, participou nas charlas desenvoltas a pasada semana por técnicos da empresa responsable da xestión dos composteiros, dirixidas ao alumnado do CPI Alfonso VII, CEIP San Clemente e dos colexios La Encarnación e San Fermín
O alcalde de Caldas de Reis, Jacobo Pérez, participou a semana pasada nunha serie de charlas sobre reciclaxe que se celebraron en varios centros educativos do concello. O alumnado do CPI Alfonso VII, CEIP San Clemente, Colexio La Encarnación e Colexio San Fermín foi o receptor dos consellos e da información achegada por un técnico da empresa responsable da xestión dos composteiros no municipio. Ademais de falar da importancia de dar unha segunda vida a obxectos e materiais de refugallo, estes coloquios tamén se centraron en concienciar á rapazada dos beneficios que supón o uso do compost, un material natural que garante a boa saúde de cultivos e plantas e que evita a utilización de materiais químicos, ademais de supoñer tamén un aforro no custe do recibo do lixo.
Jacobo Pérez valora positivamente o resultado destas charlas, que estaban adaptadas ás idades dos e das estudantes. “É importante que as novas xeracións teñan claro que o uso dos composteiros ou a correcta utilización dos recipientes de reciclaxe son prácticas indispensables que melloran a nosa calidade de vida e supoñen un beneficio enorme para a nosa contorna”, explicou, ademais de incidir en que os nenos e nenas “son os mellores transmisores destes conceptos nos seus fogares e ante os seus familiares”.
O Concello de Caldas de Reis pon o foco no coidado do medio ambiente a través de diferentes accións. Unha delas ten que ver coa concienciación da sociedade sobre a importancia de respectar os espazos naturais. Neste sentido, o alcalde tamén salienta a boa acollida que tivo a charla celebrada a principios deste mes de abril no Auditorio Municipal, que versou sobre a necesidade de coidar e conservar os montes. Foi unha iniciativa organizada pola Concellería de Benestar Social e Maiores, pensada fundamentalmente para persoas da terceira idade, pero aberta ao público en xeral.
