O presidente provincial clausurou no Teatro Lauro Olmo de O Barco os XXII Encontros Familia-Escola, organizados por Vagalume Valdeorras coa colaboración da Deputación de Ourense e da Xunta de Galicia
O Teatro Lauro Olmo de O Barco acolleu a clausura dos XXII Encontros Familia-Escola, organizados pola asociación Vagalume Valdeorras coa colaboración da Deputación de Ourense e a Xunta de Galicia. Esta iniciativa, con 22 edicións ás súas costas, pretende identificar e tratar de xeito precoz posibles desequilibrios emocionais na poboación máis nova, algo crucial para o seu presente e o seu futuro. Precisamente, a conferencia de peche, a cargo de Álvaro Bilbao, versou sobre a educación en positivo e a preparación dos máis novos para a vida.
O presidente provincial, na súa intervención, fixo referencia á sua traxectoria profesional como docente, para enxalzar a importancia deste tipo de iniciativas para detectar problemas: “estamos ante un exercicio de empatía con todas as persoas que nalgún momento da súa vida sufriron acoso escolar, trato inxusto por parte da familia ou da escola”. Ademáis de poñer de manifesto a importancia de sentar bases como esta na sociedade, quixo transmitir o seu agradecemento ás familias e profesorado presentes nas xornadas, “polo voso empeño en crear aulas e fogares seguros emocionalmente”.
Por último, Menor agradeceu a Vagalume Valdeorras o seu labor á hora de poñer en marcha “un novo paradigma da educación con implicacións a nivel social, educativo e cultural, e incorporando nos últimos tempos a dimensión en saúde mental, tan importante”. Ademáis, animounos a continuar amosando a importancia da empatía e da dinamización educativa, cultural e social para acadar unha sociedade mellor.
