Trátanse de 5.000 euros máis que o destinado o pasado ano a esta iniciativa da que neste 2025 se benefician o Play-Doc, o Festival de Cans, o FICBUEU, Novo Cinemas, o Curtas Festival do Imaxinario 2025 e o Galician Freaky Film Fest
A Xunta de Goberno da Deputación de Pontevedra acaba de aprobar o reparto de 170.000 euros, 5.000 euros máis que o pasado ano, para a celebración dos seis festivais audiovisuais na provincia que se engloban baixo a marca Rías Baixas Film Fest e que presentou hai uns días o presidente provincial, Luis López, nun acto celebrado no Pazo provincial. “Son festivais comprometidos co mellor cinema internacional e tamén co desenvolvemento do sector audiovisual galego -asegurou López-. Propostas únicas, ademais, que atraen a milleiros de visitantes cada ano á nosa provincia”.
En concreto, a 21ª edición do Play-Doc, o Festival Internacional de Cine e Documental de Tui, recibe preto de 37.000 euros; o XXII Festival de Cans 33.000 euros; a 18ª edición do Festival Internacional de Cinema de Bueu, o FICBUEU, 30.000 euros; a 10ª Edición do festival de cinema de Pontevedra: Novos Cinemas, 25.000 euros; o 53º Curtas Festival do Imaxinario 2025, 24.000 euros, e o 9º Galician Freaky Film Fest 18.000 euros.
Para beneficiarse destas achegas os festivais debían cumprir unha serie de requisitos: celebrarse no 2025, durar -como mínimo- catro días e incluír, tamén como mínimo, 20 proxeccións, así como cinco sesións ou un 10% de títulos de produción ou dirección galegas, entre outras cuestións.
