As achegas, dun máximo de 2.500 euros por entidade sen fins de lucro, permitirán poñer en marcha actividades de posta en valor do patrimonio inmaterial da provincia tanto no territorio propio como no exterior
A Deputación de Pontevedra acaba de publicar no Boletín Oficial das Provincia de Pontevedra as bases das axudas para que entidades sen fins de lucro da provincia poidan realizar actividades culturais, unha convocatoria que conta cun orzamento total de 300.000 euros. As entidades teñen un mes de prazo a partir destes luns, 12 de maio, para presentar as súas solicitudes.
Estas axudas divídense en dúas liñas, e as entidades poderán recibir achegas de ata 2.500 euros ou un máximo do 75% do orzamento das actividades. Así, actívase por unha banda unha liña dotada de 250.000 euros para a posta en valor do patrimonio inmaterial propio das vilas e comarcas da provincia, como costumes, tradicións, etnografía, crenzas e mitos; para certames e as actividades de posta en valor da pintura, da escultura, da arquitectura e da banda deseñada; para festivais, mostras, encontros e certames culturais, e para festivais ou actividades de relevancia para os intereses de promoción da cultura e as tradicións da provincia fóra da comunidade autónoma de Galicia.
E, pola outra, unha segunda liña, dotada con 50.000 euros, para a participación en festivais, certames ou concursos nacionais e internacionais, ou para intercambios culturais que potencien o patrimonio musical e cultural da provincia de Pontevedra, pero que teñan lugar fóra da comunidade autónoma de Galicia.
